Rusiyeliler kör siyasiy mabüs Oleksandr Sizikovnı Minusinskiyniñ apishanesine qaytardılar. Onı şimdi karantinde tutalar. İşğalciler onı 2023 senesi "Hizb ut-Tahrir davasında" 17 yıl apis cezasına mahküm etti, onıñ ilk 4 yılını apiste keçirdi. 2025 senesi sağlıq vaziyeti sebebinden azat etildi ve işğal etilgen Qırımğa qayttı. Amma soñra onı tekrar apiske aldılar.
"Oleksandr Sizikovğa qol tutuv" Telegram kanalında bu aqqında haber etildi.
"Bugün Saşanıñ mektübi keldi. O, Minusinkide karantinde buluna. Endi oña mektüpler yaza bilesiñiz, o quvanır", — dep haberde aytıla.
Hatırlatamız, Oleksandr Sızikovnıñ qanunsız sürgünligi 2025 senesi ilk qış ayınıñ 1-nden başlap Qırımdan 5 biñ kilometr uzaqlıqta olğan Krasnoyarsk vilâyetiniñ Minusinskiy apishanesine qadar devam ete edi.
2026 senesi qara qış ayınıñ 23-nde onıñ anası Olena Sızikova "Qırım birdemligine" Oleksandr Sizikovnıñ Rusiye tarafından Novosibirskte tutulğanını ve Minusinsk apishanesine avuştırılğanını haber etti.
Evel Suspilne Qırım telefon vastasınen oğlunıñ sağlığı ve onıñnen bağ yoqlığı içün qasevetlengenini aytqan edi.
"Aqmescitta (SimferopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) men onı kördim. Oğlum içün bu basamaq pek qıyın olğanını bilem, onı kimse desteklemey. Tek apiske alınğanlar yardım ete bile. Saşa Krasnodar ve Volgograd şeerlerinde keçişti. Anda bir qaç qısa telefon bağı bar edi. Amma şimdi onıñnen iç bir bağım yoq. Bir haber bekleyim, belki bir mektüp ya da bir hat. Onıñ sağlığı nasıl, şaraitleri ne, bilmeyim. Şimdi ne para, ne eşya, ne de ilâc yollay bilem", — dep siyasiy mabüsniñ anası añlata.
Onıñ aytqanına köre, Sizikovnıñ adliyecisi apishanege qaytarılması qararına kassatsion şikâyet berdi, amma Rusiye tarafınıñ reaktsiyası ne vaqıt olacaq — bilmey.
"O, anda kelgende, apishaneniñ müdiri haber etmeli, amma resmiy mektüp eki ayğa qadar devam ete bile. Soñki sefer Krasnodarğa ketirilgende, bir afta evelsi Saşa apiske alınğan apishaneniñ başından mektüp keldi. Şimdilik onıñ bulunğan yeri ve vaziyeti aqqında bir şey aytıp olamadılar. Advokat, Krasnoyarsk vilâyet mahkemesiniñ Oleksandrnı azat etmek qararını lâğu etken ve apishanege qaytarmaq qararını lâğu etken qararına kassatsion şikâyet berdi. Amma şimdi bayram, cevap ne vaqıt olacaq — bilmeymiz", — dep qadın qoştı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
