İşğalciler işğal etilgen topraqlarda, hususan Qırımda, gençlerni arbiyleştirmege devam eteler. İşğalci "Qırımpatriottsentr" afta başından berli yarımadanıñ oquv yurtlarında Rusiye arbiyleriniñ iştirakinen eñ az 12 tedbir keçirilgenini haber etti.
Rusiye nezaretindeki Telegram kanalında bildirilgeni kibi, "qoşma tasil ocaları" balalarğa silâ qullanmasını ögretti, tarih dersleri ve arbiy azırlıq yarışlarını teşkil etti.
Hususan, ateş azırlığı esasları boyunca ustaz sınıfları Aqmescit (SimferopolRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonındaki Perov gimnaziya mektebinde, Perekop rayonındaki "Novosilkiv litseyinde" keçti. Yarımadanıñ Ediküy rayonında arbiy tedbirler teşkil etildi.
Hatırlatamız, "Almenda" vatandaşlıq maarif merkeziniñ malümatına köre, işğal etilgen Qırımda 2025 senesi yazda 180 biñden ziyade bala raatlıq yerine Rusiye arbiyleri tarafından idare etilgen lagerlerde "arbiy azırlıq" keçti, sözde "SVO qaramanları" ile beraber arbiy oyunlarda iştirak etti.
Birleşken Milletler Teşkilâtınıñ insan aqları boyunca nezaret missiyasınıñ maruzasınıñ VI babında qayd etilgenine köre, arbiyleştirüv bütün işğal etilgen topraqlarda keçirile.
2025-2026 oquv yılından başlap, üç yaşından başlap, er afta "Müim olğan şeyler aqqında subet" dersleri keçirilecek. Evelleri bu tedbirler işğalciler tarafından da keçirile edi, amma 7 yaşından başlap balalar içün.
"Yunarmiya" faaliyeti Ukrayinanıñ bütün işğal etilgen topraqlarına tarqalğan
Daa bir alet — 2016 senesi Rusiyede meydanğa ketirilgen "Yunarmiya" arbiy areketi, soñra vaqtınca işğal etilgen Ukrayina topraqlarına, hususan Qırımğa, Donetsk, Luğansk, Zaporijjâ ve Herson vilâyetlerine tarqalğan.
Kiçik aynıñ 6-nda Baş prokurornıñ ofisiniñ bildirgenine köre, Donetskta uquq qoruyıcılar, 2019 senesinden 2025 senesine qadar 6 yaşından 18 yaşına qadar tahminen 6 biñ ukrayin balanı celp etken "Yunarmiya" Rusiye areketiniñ territorial ştablarınıñ yolbaşçılarını tapıp, şübheli saydılar.
Baş prokuratura bölüginiñ prokurorı Mıhaylo Statsenkonıñ aytqanına köre, olarnı ğıyabiy şekilde mahkeme etecekler.
"Delillerni toplamaqta bazı qıyınlıqlar bar, çünki bizge şaatlarğa, bu balalarğa, arbiyleştirüvge irişmek imkânı yoq. Aynı zamanda, İnternette bir çoq video, fotoresimler, olarnıñ çıqışları bar, olardan bu şahıslar kerçekten de böyle cinayetlerni teşkil etkenlerine inana bilemiz", — o dedi.
Prokurornıñ aytqanına köre, böyle azırlıq körgen balalar Rusiye silâlı quvetlerine qoşulıp, Ukrayinağa qarşı arbiy areketlerde iştirak etken edi.
"Ebet, olarda Rusiye Federatsiyasında vatanperver areketiniñ inkişaf strategiyası bar, o, "Yunarmiya" talebeleriniñ eñ azından 10% ileride Rusiye Federatsiyasınıñ silâlı quvetlerine qoşulmaq kerek olğanını közde tuta. Bu em propaganda, em inandırıcılıq, em de maddiy istek, ve biz balalar kerçekten de büyük olğan ve Rusiye Federatsiyasınıñ Silâlı quvetlerine qoşulğan ve duşman tarafında cenk areketlerinde iştirak etken bir sıra adiselerni qayd ettik", — Mıhaylo Statsenko dey.
Şübhelenilgenler teşkil etilgen gruppa terkibinde arbiy cinayet işlegenleri içün mahkeme etilecek (Ukrayina Ceza kodeksiniñ 28-inci maddesiniñ 3-ünci qısmı, 438-inci maddesiniñ 1-inci qısmı). Olarğa 12 yılğa qadar apis cezası berile bile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
