Vladimir şeerindeki 2-nci müstemlekede bulunğan siyasiy mabüs Ansar Osmanov dört yılda ilk kere qorantasınen körüşti. Oña uzun devamlı körüşüv içün izin berildi.
'Onıñ apayı Meryem Osmanova 'Qırım birdemligi''ne bu aqqında haber berdi. Qara qış ayınıñ 20-nde beş balasınen o, Vladimirge yolğa çıqtı. Şeer, Qırımdan aman-aman eki biñ kilomert uzaqlıqta yerleşe.
"Biz balalarnen bu yolnı böyle suvuqlıqta nasıl keçecegimizden raatsızlana edim, ve bundan evel ayağım yaralandı. Balalar babalarınen körüşmege sabırsızlıqnen bekley ediler'', — dep Meryem Osmanova añlattı.
Meryem Osmanovanıñ sözlerine köre, aqayı özüni yahşı duya.
''O, balalarınen resim yapa, bir şey yapa edi. Bu, pek bahtlı anlar edi. Ansar bu yolda iştrak ve yardım etken er keske minnetdar sözlerini bildirdi'', — dep qırımtatarnıñ apayı qoştı.
Hatırlatamız ki, 2025 senesi arman ayında 49 yaşındaki Ansar Osmanov sağlıq alı daa beter olğanını bildirdi. O zaman adamnıñ ayaqlarında ve bütün vucudında eşken peyda oldı, amma ekim onı baqmadı ve bunıñ sebebi ögrenilmedi.
Bundan ğayrı, ağır tiş ağrısı sebebinden onıñ yanına tiş ekimi keldi, amma tibbit qolçaqlar taqmadan ve temizlik qaidelerine riayet etmeden onı baqtı. Bu da tuvğanlarını raatsızlata.
Ansar Osmanov aqqında ne bilemiz
Apiske alınğanına qadar Ansar Osmanov ağaç ressamı olıp çalışqan edi. Şimdi onıñ beş balası babasız öse.
Kiçik aynıñ 9-nda saba Qırımnıñ bir qaç rayonında Qırımtatar faalcileriniñ evleri tintildi. Olarnı FSB hadimleri alıp bardılar. Bir qaç adam, şu cümleden Osmanov, yaqalandı ve Simferpol (Aqmescit) ve Sevastopoldaki (Aqyardaki) FSB idaresine ketirildi. Ansar Bağçasaray rayonınıñ Tankove (Büyük Süyren) köyündeki evinde keçirilgen tintüvden soñ yaqalandı.
Osmanov 2003 senesi, Ukrayina ve dünyanıñ diger memleketlerinde onıñ faaliyeti yasaq etilmegenine baqmadan, Rusiyede terroristik olaraq tanılğan "Hizb ut-Tahrir" islâm siyasiy firqasınıñ iştirakçisi olğanında qabaatlandı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım habelerine abune oluñız
