İşğal etilgen Qırımda Canköy rayonınıñ 1996 senesi doğğan sakini "devlet hainligi" davası boyunca 15 yıllıq apis cezasına mahküm etildi.
RİA "Novosti Krım", işğalli "FSB"ge atfı etip, bu aqqında haber etti.
Rusiye uquq qorçalayıcılarınıñ malümatına köre, qadın "Ukrayina istihbaratı tarafından qullanılğan" Telegram kanalına qoşuldı. Anda o, "Rusiye arbiy obyektleriniñ bulunğan yeri aqqında malümat toplav hızmetlerini teklif etti".
FSB iddia etti ki, "kuratorlar"nıñ talimatlarına köre, qadın belli obyektlerge barıp, olarnı fotoğa çeke ve elde etilgen malümatnı ukrayin tarafına bere edi. Bu, hususan, arbiy ava limanları, ava mudafaası sistemaları ve mahsus tehnika yerleştirilüvi aqqında malümat.
Bundan ğayrı, hızmetniñ bildirgenine köre, o, "yarımada toprağında arbiy naqliyatnı keçirgen demir yol anbarlarınıñ areketleri aqqında malümat bere edi". Rusiye quvet organlarınıñ qayd etkenine köre, qadınnıñ qoşqanı Telegram kanalını "Ukrayina Mudafaa nazirliginiñ Baş istihbarat idaresi Rusiye toprağında istihbarat ve bozuv faaliyeti içün qullana edi".
İşğalli Qırım Yuqarı mahkemesi oña umumiy rejimli mütemlekede 15 yılğa apis cezasını, 100 biñ rublelik (56 biñ ğrıvnâ) para cezasını, em de esas cezasını çekken soñ 1,5 yılğa azatlıqtan marum etüv cezasını berdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
