Vladimirdeki 2-nci apshanede 17 yılğa mahküm etilgen qırımtatar tarihçısı Seitumer Seitumerovnıñ tişleri qırqıldı, körme qabiliyeti zayıflaştı.
Onıñ ömür arqadaşı Pakize Seitumerova ''Qırım birdemligi''ne öz aqayınen apshanede uzun ziyaretten soñ bunı bildirdi.
Apayınıñ tişleri ve közlerinen bağlı meselelerden ğayrı, qadınnı aqayınıñ solğun terisi de qayğırta. Onıñ aytqanına köre, vitaminlerniñ ve küneş nurlarınıñ eksikligi onıñ sağlığına tesir ete bile edi.
"Aqayım şikâyetlenmege sevmey. İşler kerçekten de yaramay olğanda bile, er şey yahşı, dey", — dep Pakize Seitumerova ayttı
O, em de qayd etti ki, telefon etmeler içün ayırılğan vaqıt bile, çoq vaqıt aqayınen telefon vastasınen bağlanıp olamay.
"Telefon etmelernen daa qıyın ola. Muntazam sürette telefon etmeler yoq. Kimerde atta üç ayda bir kere, kerek olğanı kibi, öyle de olmay", — dep qırımtatarnıñ apayı qoştı.
Boş vaqıtlarında Seitumer Seitumerov ve Vladimir apshanesinde cezasını çekken onıñ qardaşı Osman öz-özüni terbiyelevnen oğraşalar. Olar apshaneniñ kitaphanesinden tarihiy kitaplar oqup, arap tilini ögreneler.
''Olarnı diñlegende, kerçekten de, nasıldır professornıñ lektsiyasında oturğan kibi olasıñ'', — dep Pakize Seitumerova paylaştı.
Seitumer Seitumerov aqqında ne bilemiz
Seitumer Seitumerov – tarihçıdır. O, apske alınmazdan evel turistlerni Bağçasaraynıñ diqqatqa lâyıq yerlerine alıp bara, ekskursiyalar keçire edi. Rusiye Qırımğa kirgeninden berli o, küçük qardaşı Osman kibi, vatandaşlarına ve dindeşlerine siyasiy sebeplerden açılğan davalarda yardım ete: Qırım ve Rostı-na-Donudaki mahkemelerini ziyaret ete, siyasiy mabüslerniñ balaları içün bala bayramlarını ve olarnıñ qorantaları içün tedbirler teşkil ete edi.
2020 senesi saban ayınıñ 11-nci künü Bağçasaraylı qırımtatarlarnıñ bir qaç evinde – Amet Süleymanovnıñ, ağa-qardaş Seitumer ve Osman Seitumerovlarnıñ, em de olarnıñ emcesi Rustem Seitmemetovnıñ dairelerinde bir kereden tintüvler olıp keçti. Bir qaç yıl evel Qırımnı terk etmege mecbur olğan ''Qırım birdemligi''niñ sabıq faalcisi Seitumer Seitumerovnıñ evinde de tintüv keçirildi.
2021 senesi orta küz ayında Rostov-na-Donu şeerindeki Cenübiy rayon arbiy mahkemesi Seitumer ve Osman Seitumerov, Rustem Seitmemetov ve Amet Süleymanovnı sert rejimli müstemlekede 17, 14, 13 ve 12 yılğa mahküm etti, birinci yılları mahkemede mahkeme etildi.
2023 senesi kiçik aynıñ 9-da Vlasis apellâtsiya mahkemesi birinci instantsiya mahkemesiniñ qararını tasdıqladı. Süleymanov saqatlığına ve yürek hastalığına baqmadan, mahkeme onı da müddetini keçirmege yolladı.
Tutulğan er kes 2003 senesinden berli Rusiyede yasaq etilgen ''Hizb-ut-Tahrir'' teşkilâtına azalıqta qabaatlana. Ukrayinada ve dünya memleketleriniñ çoqusında bu teşkilât milliy qanuncılıq seviyesinde sıñırlavlarsız çalışa.
Dava malümatına köre, cevapkârlarnıñ elinde silâ, patlayıcı maddeler, cenk silâları olmağan, terror aktı yapmağa planlaştırmağanlar ve başqalarını terror areketleri yapmağa çağırmağanlar. Dava malümatında Bağçasaray şeerindeki camilerde diniy ve siyasiy mevzularda olıp keçken subetlerniñ ses qaydları bar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
