Umumiy yurisdiktsiyalı sekizinci kassatsiya mahkemesi, evel apellâtsiya mahkemesi tarafından apishanege qaytaruılmaq qararını çıqarğan bütünley kör Qırım siyasiy mabüsi Oleksandr Sizikovnıñ advokatınıñ kassatsiya şikâyetini baqmağa red etti.
"Qırım birdemligi" bunı bildirdi.
Advokat şikâyetini 2025 senesi orta küz ayınıñ 21-nde Krasnoyarsk vilâyet mahkemesi apellâtsiya basamağında Sizikovnı azat etüv qararını lâğu etip, onı apishanege qaytarmağa qarar bergen soñ berdi. İmayeci bu qararnen razı olmağanını, onı qanunsız ve esassız dep sayğanını ve Sizikovnıñ çetel yardımsız yaşap olamağanını qayd etti. Onıñ aytqanına köre, birinci instantsiya mahkemesi "sağlıq vaziyetini keregi kibi tedqiq etti ve doğru qıymet kesti".
"Mahkeme tüşüne ki, Sizikovnıñ hastalığı ilerley, yan hastalıqları bar ve kerekli tedaviylev ve baqıluv olmasa, ölümge qadar menfiy aqibetleri ola bile, çünki Sizikov apis müddeti şaraitinde imkânsız olğan programmağa köre reabilitatsiya keçmeli", — dep musulmannıñ advokatı qayd etti.
Bundan da ğayrı, advokat, adamnıñ hastalığı "ağır olğanını, cinaiy cezanıñ yerine ketirilmesine keder etkenini, cezanıñ maqsatlarına irişmege imkân bermegenini" qayd etti. Advokat, müvekkiliniñ menfaatları içün BMTnıñ insan aqları eyyetine muracaat etilgenini ve istinaf qararınıñ lâğu etilmesini talap etkenini bildirdi.
Amma mahkemeci ayttı ki, kassatsiya şikâyetiniñ esası "körünmey". O, bu seneniñ qara qış ayınıñ 16-ncı künü bu qararnı red etti.
Bundan soñ mahkemeci Rusiye Federal Cezalandıruv hızmetiniñ 42-nci tibbiy-sanitar bölüginiñ ekim eyyetiniñ 2025 senesi saban ayınıñ 21-nde çıqarğan qararına esaslandı. Onıñ qayd etkenine köre, Sizikovnıñ hastalığı — tam körlük — cezasını çekmege imkân bermegen hastalıqlar cedveline kirse de, ve o da "cinayetler yapılğanına qadar" hastalanğan olsa da, "bu hastalıqnıñ ilerilemesi ve mahkümniñ ayatına telüke olğanı aqqında malümat yoq".
"Sağlıq vaziyeti sebebinden o, umumiy sebeplerden tüzetüv müessiselerinde tutulamaz. Mahküm etilgenniñ hastalıq derecesi, alâmetleri ve ciddiy hastalıq tanılmasınen bağlı diger hastalıqları belli degil. Sizikovnıñ III basamaq hipertonik hastalığı (IV telükesi) kontrol etile. Klinik ve reabilitatsiya perspektivaları bu hastalıq içün elverişlidir", — dep mahkemeci bildirdi.
Oleksandr Sizikov 2009 senesi qaza neticesinde bütünley kör oldı ve I-nci gruppa saqatı. Bundan da ğayrı, o, hronik miden ve bel hastalıqlarından da zarar köre.
Hatırlatamız ki, 2025 senesi mayısnıñ 26-nda Rusiye Federatsiyasınıñ Krasnoyarsk vilâyetiniñ Minusinsk şeer mahkemesi Oleksandr Sizikovnı hastalıq sebebinden apisten boşatqanıbelli oldı. O, Qırımğa qayttı.
Orta küz ayınıñ 21-nde Krasnoyarsk vilâyet mahkemesi Sizikovnıñ azat etilüv qararını lâğu etip, apishanege qaytarmağa qarar berdi.
Orta küz ayınıñ 23-nde gece "polis" onı işğal etilgen Qırımnıñ Bağçasaray rayonında tintti ve yaqaladı.
Ertesi künü Qırımnıñ işğalli Bağçasaray rayon mahkemesi kör musulmannı "poliske boysunmağanı" içün 10 künge memuriy apis cezasına mahküm etti.
Orta küz ayınıñ 31-nde işğalli Qırım Yuqarı mahkemesi bu "qarar"nı lâğu etti ve onı apisten boşatmaq kerek ediler. Amma advokat Emil Kurbedinov onı izolâtordan alıp olamadı.
Boş aynıñ 5-nde advokat bildirdi ki, Qırım siyasiy mabüsini Rusiye işğalcileri Simferopolnıñ (Aqmescitniñ) 1-inci SİZOsında tutmağa devam eteler ve onı etap etmege azırlaylar.
Qara qış ayınıñ 8-nde kör Sizikovnı Qırımdan 5 biñ kilometr uzaqlıqta yerleşken Rusiyeniñ Minusink şeerindeki apishanege etap ettiler.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
2025 senesi mayıs ayınıñ 26-nde belli oldı ki, Krasnoyarsk vilâyetiniñ Minusinsk şeer mahkemesi hastalığı sebebinden Oleksandr Sizikovnı azat etti. O, Qırımğa qayttı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
