İşğalciler doquz qırımlı siyasiy mabüsniñ Rusiye vatandaşlığını coydı. Demek ki, azat etilgen soñ olar işğal etilgen Qırımğa qaytıp olamaycaqlar.
"Qırımtatar resurs merkeziniñ" idare reisi Eskender Bariyev qırımtatar halqı Meclisiniñ eyyetiniñ Avstraliyanıñ Ukrayinadaki Fevqulâde ve Vekâletli Elçisi Pol Lehmannen körüşüvinde bu aqqında bildirdi.
"Bunıñ sebebi — Qırımnıñ siyasiy mabüslerini taqip etken "devlet hainligi", "terrorizm", "başqa devlet ile işbirlik" ya da "arbiy cedvelge aluvdan vazgeçüv" qabaatlarıdır. Yani işğalciler başta insanlarnı zorbalıqnen 2014 senesi vatandaşlıqqa aldılar, soñra olarnı Rusiye qanunları boyunca mahküm ettiler, şimdi ise Rusiye vatandaşlığını coyalar. Bu demek ki, bir çoq qırımlı siyasiy mabüs, hususan qırımtatarlar, azat etilgen soñ evlerine qaytıp olamazlar ve sürgünlik vaqtında doğğan yerleri olğan Merkeziy Asiya memleketlerine sürgün etilecekler", — dep o Facebookta yazdı.
Hatırlatamız, qara qış ayınıñ 21-nde Rusiye qırımtatar siyasiy mabüsi Eldar Kantimirovnıñ vatandaşlığını lâğu etti.
Qanunsız apishaneden azat etilgen soñ, yarımada işğal etilgen olsa, o, Qırımğa qorantasına ve 4 balasına qaytıp olamaycaq. Rusiye akimiyeti onı 2021 senesi sahte "Hizb ut-Tahrir davasında" 12 yıl apis cezasına mahküm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
