"Sarı şerit" cemaat areketiniñ iştirakçileri qara qış ayınıñ 13-nden berli qar yağğan işğal etilgen Qırımnıñ Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) civarında yañı ukrayin tarafdarı aktsiyasını keçirdiler.
Areket öz Telegram kanalında qara qış ayınıñ 18-nde bu aqqında bildirdi.
Yerli faaller Aqmescitke baqqan ağaçlarnıñ dallarına sarı şeritlerni bağladı — işğalge qarşılıq timsali ve Qırım Ukrayina olğanını hatırlatmaq içün.
"Ava vaziyeti bizge yardım ete. Qar yağğanda soqaqlar boş ola, işğalciler de az kele", — dep areket iştirakçilerinden biri qayd etti.
Hatırlatamız, işğal etilgen Qırımda qara qış ayı 16-19 künleri furtuna havfı ilân etildi. Qar, boranlı furtuna, yollarda buzlavuq, saniyede 25 metrge qadar yel ve tuman beklenile.
Bundan evel "Sarı şerit" areketiniñ iştirakçileri vaqtınca işğal etilgen topraqlardan, hususan Qırım ve Ukrayinanıñ cenübinden kelgen ukrayinlerni Yañı yılnen hayırladılar.
"Yañı yılda tilegimiz sade ve yekâne — işğalden azat olmaq. Biz toqtamaymız ve Ukrayinanıñ ğalebesini yaqınlaştırmaq içün elimizden kelgenini yapmağa devam etemiz", — dep faaller qayd ettiler.
Bundan evel areket işğal etilgen topraqlarda, şu cümleden Qırımda, bayram aktsiyasını teşkil etken edi. İnternette areket iştirakçileriniñ bayramlarını qayd etken fotoresimleri derc etildi: urba kiygenler, ananeviy 12 yemek pişirgenler, yaşlar qoyğanlar ve olarnı ukrayin timsallerinen yaraştırğanlar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
