Ukrayina Baş prokurorı Ruslan Kravçenko Nariman Süleymanovnı Qırım Muhtar Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığınıñ yañı yolbaşçısı vazifesine tayinledi. Ondan evel bu vazifeni İğor Ponoçovnıy eda etken edi.
Qırım Muhtar Cumhuriyeti ve Sevastopol (Aqyar) şeeri prokurorlığınıñ saytında bu aqqında haber berildi.
2026 senesi qara qış ayınıñ 14-nde çıqarılğan emirge binaen, Süleymanov beş yılğa muhtariyet prokurorlığınıñ yolbaşçısı vazifesine tayinlendi. Bundan evel o Dnipropetrovsk vilâyet prokurorlığınıñ reisiniñ muavini edi.
Bundan da ğayrı, Süleymanov Facebook saifesinde öz taqımına evelki iş içün teşekkür bildirdi ve zenaatdaşlarınen vedalaştı.
"Bu vaqıt içinde çoq şey yaptıq, ve men anda çalışqan insanlarnıñ ihtisaslılığından pek memnünim. Bu qısqa, amma meraqlı yolnı beraber keçken er keske minnetdarım. Er kün ücüm etilgen bir bölgeniñ küçü ve dayanıqlığı! Evge qayttım, amma biraz farqlı alda!", — dep bildirdi o.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
