İşğal etilgen Qırımda ruslar Qırım siyasiy mabüsi Mamut Belâlovğa tibbiy yardım bermeyip tutalar. Onı işğalciler "silâ saqlağanı" ve işğalli "Qırım kurort ve turizm nazirligi"niñ sabıq yolbaşçısı Vadim Volçenkonı "öldürmege azırlağanı"nda qabaatlap, qanunsız sürette mahküm ettiler.
Siyasiy mabüsniñ sağlıq vaziyeti aqqında Qırımtatar resurs merkeziniñ idare reisi Eskender Bariiev Facebookta yazdı.
"İşğalcilerniñ insaniyetsizligine ve zulumına şaşmağa devam etem. Olarnı ayvanlarnen qıyaslap olamayım, çünki ormannıñ bile öz qaideleri ve qanunları bar, anda ise ne yazmaq, ne de qıçırmaq kimsege ve iç bir şeyge kerek. İç bir qaide yoq, bütünley nafilelik ve qanunlarğa emiyet berilmez. Tasavvur etiñiz ki, siziñ süydik infektsiyañız bar, yüksek sıcağıñız bar, SİZOda ilâc yoq, qorantañızdan alğan ilâclar ise berilmey. Neticesinde başlanğıç infektsiya büyrek infektsiyasına ve diger somatik hastalıqlarğa yol aça bile. Buña baqmadan, bütün kün yatmağa bile izin berilmey", — dep Bariiev Mamut Belâlovnıñ sağlıq vaziyeti aqqında yazdı.
Onıñ aytqanına köre, işğalciler Mamut Belâlovnı qanunsız sürette işğal etilgen Qırımnıñ 2-nci SİZOda tutalar.
"O fenalaşqan soñ oña ilâc bermege izin berdiler, amma ne olğanını aytmadılar. Böyle tibbiy yardım ya da hastalıq teşkerüvi, qanunsız apislerge qoşulsa, siyasiy mabüslerimizge de tesir ete. Genç adamnı añlaşılmağan sorğularğa çağırtalar, tuvğanlarınen körüşmege ve telefon etmege izin bermeyler", — dep Bariiev qoştı.
İlk qış ayınıñ 17-nde, Bariievniñ aytqanına köre, Mamut Belâlovnıñ qanunsız ükmü boyunca kassatsiya "mahkemesi" keçirildi. Siyasiy mabüsniñ apis cezası 12 yıldan 11 yıl ve 6 ayğa qadar qısqartıldı.
2025 senesi ilk qış ayınıñ 28-nde Mamut 27 yaşında olacaq, olardan 3 yıl ve 4 ayı Rusiyeniñ qanunsız esirliginde tutula.
Hatırlatamız ki, Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) Kıyiv rayon mahkemesi 2024 senesi Mamut Belâlovnıñ davasında üküm çıqardı. O, silâ saqlağanında ve işğalli Qırım kurort ve turizm nazirliginiñ sabıq yolbaşçısı Vadim Volçenkonı öldürmege azırlağanında qabaatlandı. Volçenko özü bir million ruble (≈ 500 biñ ğrıvnâ — muar.) miqdarında maneviy zarar tazminatını talap etti.
Bundan evel Eskender Bariievniñ bildirgenine köre, belli olmağan sebeplerden işğalciler onı Volgogradğa etap etken soñ işğal etilgen Qırımğa qaytardılar.
"Bilgenime köre, keçenlerde Mamutnı FSB binasına alıp ketkenler, advokatı olmağan yerde onı "qorqunçlı şekilde" sorğuğa çektiler. Qırımdaki işğalli Rusiye adalet sisteması aqqında bilmek kerek olğan er şey budır. İşkence Qırımdaki işğalcilerniñ esaslarına köre yapıldı: Ukrayina qanunlarını körmemezlikke uralar, halqara uquqnı eşitmediler ve eşitmege istemeyler, Rusiye qanunlarını — istegenlerini istegenlerinen yapalar!", — dep Bariiev yazdı.
Eskender Bariiev tarif etti, işğalciler Mamut Belâlovnı bir qaç urdılar.
"Onı 09.09.2022 apiske alınğan soñ "qattı işkencege" oğrattılar, işğalli akimiyet "oña iç bir alâqası olmağan cinayet işlegenini kamera ögünde itiraf etmesini talap ettiler", — dep Bariiev añlattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
