Oleg Zubkov, işğal etilgen Yaltadaki "Taygan" arslanlar bağçası ve "Kazka" ayvanat bağçasına para cezasını bergen eki "rayon mahkemecisi"ni qararını işğalli "Qırım Yuqarı mahkemesi"ne şikâyet etkenini bildirdi. Onıñ malümatına köre, aşağı instantsiya "mahkemecileri"niñ ükümleri lâğu etildi.
Oleg Zubkov Ukrayinada yasaq etilgen "Vkontakte" içtimaiy ağında derc etilgen videoda bunı bildirdi.
Zubkovnıñ sözlerine köre, işğalli "Qırım Yuqarı mahkemesi"niñ "mahkemecisi" Şıdakova Oksana eki şikâyetni baqtı.
Birincisi — 2019 senesi boş aynıñ 13-nde "Yalta şeer mahkemesi"niñ işğal etilgen Yaltadaki "Kazka" ayvanat bağçasına 90 biñ rublelik (≈ 45 biñ ğrıvnâ — muar.) para cezasını berüv qararına ait edi. Zubkovnıñ aytqanına köre, ayvanlar yaramay şaraitte yaşağnı sebebinden onıñ biznesi şikâyet etildi.
"Bu, diger 300-500 biñlik para cezalarına baqqanda pek paalı degil, lâkin raatsızlay, çünki daa bir kere bu domuz davaları, ayvanatçılar, satıluv maqsadınen ayvanlarnı yetiştirgen büyük çiftliklerniñ qararlarını bozdı ve ayvanat bağçasından kelgen ayvanlarnı mında ketirdi. Bu sebepten mahkeme añladı ki, ayvanat bağçasındaki ayvanlar bir şey, çiftlik ayvanları ise başqa kategoriyadır", — dep Zubkov videoda añlattı.
Ekinci şikâyet işğalli "Biloğirsk (QarasuvbazarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) rayon mahkemesi"niñ "mahkemecisi" Grebennikova Natalyanıñ qararına ait edi. O, "Taygan" arslanlar parkı ve "Kazka" ayvanat bağçasınıñ memurına para cezasını berdi.
Zubkovnıñ aytqanına köre, bu vaziyet Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonından Rusiye arbiy hızmetçisiniñ ayvanlar tarafından ısırılğanına ait edi. Videoda Zubkovnıñ aytqanına köre, adam park idaresine muracaat etmedi, tek işğal etilgen Saqda ekimge muracaat etti. Bu vaqiadan soñ, arslanlar parkı teşkerildi ve park memuriyeti "vaqıtında cevap bermedi" dep, qararlar çıqarıldı.
"Mahkeme şikâyetimizni, qoşma delillerni baqıp çıqtı ve memuriy uquq bozuluvı qayd etilmegeni sebebinden mahkeme qararını lâğu etti", — dep Zubkov bildirdi.
Videoda o şunı da bildirdi ki, soñki bir qaç yıl devamında o mahkemelerde öz iş künlerini başlamağa mecbur ola ve ileride onı işğalli "Qırım tabiat ve resurslar nazirligi" ile mahkeme davası bekley.
Oleg Zubkov "Taygan" arslanlar parkı ve Yalta "Kazka" ayvanat bağçasınıñ saibi olaraq belli. 2014 senesine qadar Ukrayina vatandaşı edi. Qırım işğal etilgen soñ işğalcilerge çalışmağa başladı.
2022 senesinden başlap Qırımğa qıtaiy Ukrayinanıñ işğal etilgen topraqlarından ayvanlarnı alıp ketken edi. 2024 senesi Suspilne Qırım, Oleg Zubkovnıñ Ukrayina VİETından ayvanlarnıñ eñ büyük partiyasını öz ayvanat bağçaları içün ketirgenini bildirdi. Beş maşnada 120 ayvan işğal etilgen yarımadağa ketirildi, olarnıñ arasında maymunlar, leopardlar, deve quşları, qaplanlar, arslanlar, papağanlar, antilopalar ve qoñur ayuvlar bar edi. O vaqıt o, ayvanlarnı qıtaiy Ukrayinağa 15 kere alıp ketkenini iddia etken edi ve Geniçesk civarındaki Arabat belinde yerleşken ayvanat bağçasınıñ aman-aman episi avuştırılğan edi.
2024 senesi işğalciler Herson vilâyetiniñ işğal etilgen qısmındaki "Askaniya Nova" biosfera qoruğından zebranı çıqardılar. Olarnı Qırımdaki "Taygan" safari parkına ketirdiler. Herson prokurorlığı, Zubkov "Askaniya Nova" qoruğından qanunsız sürgün etilgen ayvanlarnen bağlı cinaiy davanıñ mabüsi olğanını bildirdi.
Keçken qış Oleg Zubkov arslanlarnı yılnıñ suvuq mevsiminde açıq avada qaldırdı, olarnı gecelemek içün mahsus donatılğan sıcaq ocaqlarğa avuştırmadı. Yerli ayvan qorçalayıcılar, Zubkov ayvanlarnıñ sağlığını telükege oğratqanını iddia ete ediler.
İşğal etilgen Mariupoldan da arslanlar ve ayuvlarnı alıp ketti. Rusiye kütleviy haber vastaları bu arslanlarnıñ işçilerge ücüm etkenleri aqqında — hususan, 2024 senesi küzde Levkadiya Perovalovanıñ ölümi aqqında defalarca haber etti. Bu yaz Zubkovğa arslan ücüm etti, bundan soñ iş adamı reabilitatsiyağa tüşti.
Evel Suspilne Qırım Zubkovnıñ Portugaliyada öz biznesini nasıl kenişletkenini tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
