Yañı yıl bayramları arfesinde işğalciler Qırım köpründe havfsızlıq tedbirleriniñ quvetleştirilgenini ilân ettiler. RF Naqliyat nazirliginiñ qararına binaen, anda nezaret noqtalarınıñ sayısı arttırıla ve naqliyat teşkerüvleri quvetleştirile.
RF ükümetiniñ matbuat hızmetine esaslanıp, RİA "Novosti Krıma" bu aqqında haber berdi.
RF naqliyat nazirliginiñ yolbaşçısı Andrey Nikitin Qırım köpründe "ekstremal areket havfsızlığı"nı temin etmege avale etti.
RF Naqliyat nazirliginiñ malümatına köre, bayram arfesinde köpürde havfsızlıq tedbirleri quvetleştirildi. Yol areketini nezaret etmek içün 212 qoşma nezaret noqtası celp etildi. Nazirlikniñ bildirgenine köre, bu, künde 17 520 maşnanı teşkermege ve naqliyatnıñ toqtatılmaması içün imkân berecek.
Bundan da ğayrı, Nikitin Rosavtodor ve "Avtodor" şirketlerine mahsus tehnika ve reagentler yedeklerini teşkil etmege emir etti.
Hatırlatamız ki, işğal etilgen Qırımda yaramay ava sebebinden 17 biñ sakin elektriksiz qaldı. Bozulğan ava naqliyat meselelerini de yarattı. Bundan da ğayrı, Qırımnen bağlanğan trenler keçiktirildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
