Bir qaç kün evelsi Rusiyeniñ işğal etilgen Qırımdan ağır hasta qırımlı siyasiy mabüs Lenur Halilovnı Rusiyeniñ Arhangelsk şeerindeki apishanege ketirgenleri belli oldı. Şimdi onı karantinde tutalar ve oña ilâc bermeyler. Lenur Halilovağa, limf noduslarına metastaz olğan qaraciğer kanseri, hronik hepatit C, II derece gipertonia, qaraciğer kisesi ve sol büyrek diagnozı qoyuldı.
"Qırım birdemligine" Umid Hudoyberdiyevniñ qadını Arhangelskte etapnıñ yekünlengeni aqqında bildirdi.
Onıñ aytqanına köre, siyasiy mabüsniñ qanunsız sürgünligi bir buçuq ay devam etti. Şimdi o, acele tibbiy yardımğa muhtac, onı tüzeltüv müessisesi temin etmey.
"O, Arhangelskke keldi, şimdi "karantin"de buluna. Oña iç bir ilâc berilmey. Qaraciyerniñ alı ağır, ağrılı. Onıñ küçü yoq, küçsüzligi bar. O, er kün telefon etip, iç bir yardım kösterilmeycegini ayta, tek analgin berilecegini ve nezaretçiler onı bermege az razı olğanını ayta. "Seniñ hastalıqlarıñ içün tedaviylev yoq, biz seni tedaviylep olamaymız", — deyler. Onı qaytarğanlarına şaştılar. Onıñ aytqanına köre, yanında ketirgen ilâcları endi yoq. O, kassatsiya şikâyetini bergen advokatlarğa ümüt ete", — dep siyasiy mabüsniñ apayı tarif etti.
Qanunsız apiske alınğanına qadar Lenur Halilov Aluşta rayonınıñ İzobilne köyünde "Aluşta" mustaqil musulman cemiyetiniñ reisi edi. Erkek diniy bayramlarnı teşkil ete, qorantalarğa cenaze ve merasimlerde yardım ete, cemaatqa er künlik yaşayışta yardım ete edi.
2019 senesi onı Qırımdaki büyük tintüvlerden soñ yaqaladılar, Rusiye Federatsiyasınıñ Cenübiy okrugınıñ arbiy mahkemesi Halilovnı "Hizb ut-Tahrir davasında" Aluşta gruppası çerçivesinde "terroristik gruppasınıñ" teşkilâtçısı olaraq tanıdı. Lenur Halilov qanunsız alda 18 yıl sert rejimli koloniyada qalmasına üküm etildi.
2024 senesi arman ayınıñ 20-nde İsakogorsk rayon mahkemesiniñ qararına binaen, o, koloniya apis cezasından sağlıq vaziyeti sebebinden resmiy şekilde azat etildi. Onıñ hastalıqları Rusiye Federatsiyası ükümetiniñ №54 qararınen tasdıqlanğan cedvelge kirsetile, oña köre, insan "umumiy rejimli müessisede tutulamaz" ve ihtisaslı tibbiy müessisede tedaviylevge muhtac.
Arman ayınıñ 23-nde evine, Qırımğa qayttı. Ekim ayınıñ ortasında Arhangelsk vilâyet mahkemesi prokurornıñ muracaatını qanaatlendirip, Halilovnı apishanege qaytarmağa qarar berdi, boş aynıñ 7-nde ise Halilovlarnıñ evine Aluştanıñ işğalci uquq qoruyıcılarından dört kişi keldi.
Halilovnıñ advokatı Emil Kurbedinov ekim ayınıñ 14-nde Arhangelsk vilâyet mahkemesiniñ musulmannı koloniyağa qaytarmaq qararına qarşı kassatsiya şikâyetini berdi.
Lenur Halilov aqqında ne bilemiz
Lenur Halilov — "Aluşta" mustaqil musulman cemiyetiniñ sabıq reisi.
2019 senesi ilk yaz ayınıñ 10-nda Qırımda dört qırımtatar musulmanınıñ evinde OMON, mahsus hızmetleri ve Aşırıcılıqnen küreş merkeziniñ hadimleri tarafından kütleviy tintüvler keçirildi. Aluştada quvetçiler imam vazifelerini eda etken Ruslan Nagayevni ve iş adamı Eldar Kantımırovnı, Malıy Mayak (Büyük Lambat) köyünde — Ruslan Mesutovnı, İzobilne (Körbekül) köyünde ise — Lenur Halilovnı tuttılar.
Em Mesutov, em de Halilov yerli din cemiyetleriniñ yolbaşçıları ediler. Apiske alınmazdan evel olar cemaat faaliyetinen oğraşa ediler: musulman bayramlarını teşkil ete, cenazelerge yardım ete, vesiqalarnı resmiyleştire, namaz keçire ediler.
2021 senesi arman ayınıñ 16-nda Cenübiy bölgeniñ arbiy mahkemesi Hizb ut-Tahrir davasınıñ "Aluşta gruppası"nıñ mebüslerine üküm çıqardı. Nagayev ve Kantımırov 13 ve 12 yılğa, Halilov ve Mesutov 18 yılğa üküm etildi. Soñkileri "terroristik gruppası"nıñ teşkilâtçıları, Nagayev ve Kantımırov ise onıñ iştirakçileri olaraq tanıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
