Sevastopolda çoq qatlı evlerniñ temel tamiriniñ fiyatı 20%-ge köterildi

Qara qış ayınıñ 1-den itibaren işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakinleri yañı tarif boyunca temel tamiri işleri içün para töleycekler. İşğalli akimiyet onıñ fiyatını 20%-ge köterdi.

İşğalli Sevastopol (Aqyar) akimiyeti İlk qış ayınıñ 24-nde tariflerniñ arttırılması aqqında qarar aldı, dep "For Post" Sevastopol neşiri yazdı.

İşğal etilgen Sevastopol (Aqyar) sakinleri er ay tölecek çoq qatlı evlerniñ tamir tamiri içün eñ az ödeme 2026 senesi qara qış ayınıñ 1-nden başlap, bir kvadrat metr umumiy meydanlıqtan 24 ruble 36 kapik (≈12 ğrıvnâ — muar.) teşkil etecekler. Evel Sevastopol (Aqyar) sakinleri 19 ruble 55 kapik (≈9 ğrıvnâ — muar.) töley ediler.

Rusiye şeerlerinde er yıl umumiy mülkniñ tamir etilmesi içün masraflarnıñ indeksatsiyası keçirile. İşğal etilgen Sevastopolda (Aqyarda) bu köstergiç Sankt-Peterburgtan daa büyük, amma Moskvadan daa az, dep Sevastopol (Aqyar) neşiri qayd etti.

Umumiy meydanlığı 30 kvadrat metr olğan kvartira içün er ay 730 ruble (≈365 ğrn — muar.) tölemek kerek, eki odalı "hruşçovka" (45 kvadrat metr) içün — tahminen 1,1 biñ ruble (≈550 ğrn — muar.) ve 60 kvadrat metr olğan kvartira içün 1,5 biñ ruble (≈750 ğrıvnâ —muar.) tölemek kerek.

İşğal etilgen Qırımda tamir işleriniñ fiyatı qara qış ayınıñ 1-den başlap bir kvadrat metr içün 11,46 ruble (≈5,5 ğrıvnâ — muar.) olacaq.

Ukrayina tış istihbarat hızmetiniñ malümatına köre, astyapınıñ yüksek derecesi aşınılması ve onıñ yañartıluvı yavaş olğanı sebebinden Rusiyede mesken-kommunal hocalığı saasında buhran arttıra. İşğal etilgen Sevastopolda (Aqyarda) vaziyet eñ kergin.

"Bölgelerde aşınuv derecesi 40-90%-ge qadar yete, eñ yaramay köstergiçler — işğal etilgen Sevastopolda (90%), Şimaliy Osetiyada (57%) ve Lipetsk vilâyetinde (56%). Er yıl ağlarnıñ tek 1,9-2%-i yañartıla, stabilleştirmek içün eñ az 4%-ini tamir etmek kerek", — dep hızmet añlattı.

Umumen işğal etilgen Qırımda kommunal hızmetleri 2026 senesi qara qış ayınıñ 1-nden itibaren artacaq — idare etüv şirketleri tariflerni 12%-ge qadar kötere bile.

Hatırlatamız ki, boş ayda Milliy muqavemet merkezi bildirdi ki, Sevastopolda (Aqyarda) işğalciler şeer sakinleriniñ kommunal hızmetler, yani suv ve gaz içün tölegen paralarınıñ bir qısmını çetelge yollaylar — "Sevastopolgaz" sabıq reberliginiñ soyları ve ortaqlarınıñ esaplarına yollanıla.

Читати ще