"İspanets" lağabınen "Espanyola" rusiye brigadasınıñ tesisçisi Stanislav Orlovnı işğal etilgen Sevastopoldaki (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addaki) öz yaz evinde atıp öldürdiler.
"ASTRA" Rusiye neşiri, video nezaret kameralarından alınğan malümatqa esaslanıp, bunı bildirdi.
Jurnalistlerniñ malümatına köre, ilk qış ayınıñ 4-nde Orlov, soñ zanalarda yaşağanı "Flotskiy" bağçasaray cemiyetiniñ 51-nci evinde öldürildi.
"ASTRA tarafından alınğan videoğa köre, ilk qış ayıniñ 4-nde yerli vaqıtqa köre saat 12:17de BKCniñ (bagçılıq kommertsiyasız cemiyeti — muar.) 51-inci evine dört maşina keldi. Olardan silâlı ve maska taqqan adamlar çıqtılar. Qomşular bir qaç atış eşitken. Şaatlarnıñ aytqanına köre, Orlov keri ateş açmadı", — dep neşir yazdı.
ASTRA menbalarınıñ malümatına köre, İspanetsni öldürmek içün sebep, silâ ticaretinde ve teşkil etilgen cinaiy teşkilâtlardan iştirak etkeninde şübe edi.
The Insider neşiriniñ bildirgenine köre, Stanislav Orlovnıñ ölümi aqqında laflar ilk qış ayınıñ 11-nden berli yayıla edi.
İlk qış ayınıñ 19-nda Telegramda brigada bunı tasdıqladı, lâkin ölüm sebepleri aytmadı.
Stanislav Orlov ve "Espanyola" brigadası aqqında ne bilemiz
TsSKA fanat areketiniñ teşkilcisi ve temsilcisi Stanislav Orlov Donbasnıñ işğal etilgen qısmına 2014 senesi keldi.
2022 senesi baarde "Espanyola" batalyonı quruldı, o, "Vostok" batalyonınıñ 114 motoatıcı brigadasınıñ terkibine kirdi.
2024 senesinden başlap, bölükniñ adı 88-nci "Espanyola" istihbarat-diversiya brigadası ola.
The Insiderniñ yazğanına köre, Stanislav Orlov ücüm etici dronlarnı idare etüvde iştirak etti — Rusiye arbiy hızmetçileri Moskva merkezindeki vatandaş binalarını arbiy maqsatlar içün qullana ediler.
Hususan, "Moskva-Siti" kompleksindeki odalar aqqında söz yürsetile edi. İdare eticiler, The Insider yazğanına köre, esasen mesken daireler ve ofisler içün qullanılğan "Paytahtlar şeeri" qullesiniñ odalarından birinde bulundılar.
"Halqara gumanitar uquqqa köre, arbiy maqsatlar içün vatandaş binalarınıñ qullanuvı pek sıñırlana. Jeneva şartnamesi, vatandaş obyektleri, hususan mesken evler ve ofisler, ücüm obyektleri olmamaq ya da cenk areketleriniñ desteklenmesi içün qullanılmamaq kerekligini belgiley", — dep neşir yazdı.
Brigada özü Mariupol, Vuğledar, Avdiyivka ve Çasovıy Yardaki uruşlarda iştirak etkenini bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
