İlk qış ayınıñ 18-nde, İtaliya Senatı Prezidiumınıñ ştab-kvartirası olğan Custiniani sarayında "Terror sisteması. Rusiyeniñ Ukrayina işğali"halqara tedbiri olıp keçti. Tedbir iştirakçileri işğal etilgen Qırımda siyasiy sebeplerden apiske alınğan eñ azdan 486 insan bar olğanını ve tek 12 insan evlerine qayttı, dep qayd ettiler. Siyasiy mabüslerniñ qorantaları İtaliyanı ve halqara ortaqlarını Rusiyege basqını quvetleştirmege ve elâk olğan grajdanlarnı acele azat etmege çağırdılar.
İlk qış ayınıñ 21-nde Qırımtatar resurs merkezi bu aqqında bildire.
Tedbir vaqtında qırımlı siyasiy mabüs, sabıq ukrayin arbiyi Serğiy Lıhomanovnıñ qardaşı Tatyana Zelena eki yıl evelsi Qırımda qardaşınıñ hırsızlanuvı aqqında ikâye etti.
O, apiske alınğanını körgen üç yaşında qızı içün ruhiy travma, 15 yıllıq apis cezası ve işkence aqqında da bildirdi. Lihomanov, advokat ve tibbiy yardımsız, Taganrogda buluna.
Bundan ğayrı, Zelena Rusiye tarafından qanunsız sürette apiske alınğan diger ukrayinlerni de hatırladı: Rustem Ğuğurık, Serğiy Tsığip, Konstantın Maksımov, Viktor Bondarenko, Konstantın Zinovkin.
Onıñ aytqanına köre, bu ve biñlernen diger ukrayinler bugün öz serbestligi ve ayatı paalılığında Avropanıñ serbestligini qorçalağan "divar"nıñ bir qısmı olalar.
Tedbir iştirakçileri qayd ettiler ki, ukrayin vatandaşlarınıñ esir alınması meselesi halqara kün tertibinde birinci yer almaq kerek, cenkke dair er angi siyasiy qarar ise qanunsız tutulğan şahıslarnıñ azat etilmesinen başlamaq kerek.
Olar İtaliya Senatını FSB, FSVP ve Rosgvardiyanı terroristik teşkilâtlar olaraq tanımağa ve Rusiye Tış işler nazirligine muracaat etip, 2014 senesinden berli esir alınğan bütün ukrayin vatandaşlarını acele azat etmege çağırdılar.
"Barışıq — vatandaşlarnıñ işğali ve apis etilmesi degil. Barışıq — vatandaş ve arbiy balalarımıznıñ evge qaytmasıdır", — dep Tetyana Zelena bildirdi.
Tedbir çerçivesinde Yevğeniya Çirikovanıñ "Hapishaneler: terror sisteması" vesiqalı filminiñ taqdim merasimi de olıp keçti.
Daa evel pensiyağa çıqqan ukrayin arbiyi, Poltava vilâyetinde doğğan Serğiy Lıhomanovnı, Qırım işğalci akimiyeti "devlet hainligi" içün 15 yılğa qadar apis cezasına mahküm etti, o, Rusiyeniñ Tağanroğ şeerindeki №2 SİZOğa avuştırıldı. Bir qaç afta devamında qorantası onıñ bulunğan yeri aqqında bir şey bilmey edi, dep QRM haber ete.
İlk qış ayınıñ 10-na qadar, QRM malümatına köre, Rusiye SİZO ve koloniyalarında 325 Qırım siyasiy mabüsi bulunalar, olardan 42 — qadın.
İlk qış ayınıñ 19-nda OON Baş Assambleyası "Ukrayinanıñ vaqtınca işğal etilgen topraqlarında, şu cümleden Qırım Muhtar Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeerinde insan aqları vaziyeti" adlı yañartılğan rezolütsiyanı qabul etti. Vesiqağa 79 memleket qoltuttı, 16-sı qarşı çıqtı, 73-ü rey bermedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
