Ukrayina telükesizlik hızmeti bildirdi ki, onıñ "Alfa" mahsus operatsiyalar merkeziniñ uzaq uçuşlı uçaqları işğal etilgen Qırımda Belbek Rusiye arbiy ava limanında eki Su-27 uçağını urdı. Bu eki uçaqnıñ fiyatı 70 million dollar. Olardan biri yoq etildi.
UHH ilk qış ayınıñ 20-nde Facebookta bu aqqında haber etti.
"Uçaqlardan biri, bütün silâsı ile tren yolunda edi ve cenk uçuşına azır edi. O yoq etildi", — denile beyanatta.
Telükesizlik hızmetinde de dispetçer qullesi zarar körgenini tasdıqladılar, bu ise ava limanında uçuşlarnı teşkil etmek ve nezaret etmek içün qıyın ola bile.
"UHH-niñ esas arbiy ava limanlarına ücümleri, em de vaqtınca işğal etilgen Qırımda duşman uçaqları ve AMS-nıñ yoq etilmesi onıñ regiondaki arbiy imkânlarını bayağı eksiltti. Bu sistemli iş ileride de devam etecek", — dep müessisede qayd ettiler.
UHH hatırlattı ki, bu, UHH-nıñ soñki künleri Belbek ava limanına yapqan ekinci muvafaqiyetli ücümidir. İlk qış ayınıñ 18-nde hızmetniñ uçucısız uçaqları bu ava limanına yüzlernen million dollarlıq Rusiye tehnikanı urdı: eki "Nebo-SVU" RLS, S-400 "Triumf" ZRK-dan 92N6 RLS, "Pantsır-S2" ZRK ve MİĞ-31 uçağı tolu silâ ile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
