İlk qış ayınıñ 18-nde gece Ukrayina mudafaa quvetleri Ukrayinanıñ vaqtınca işğal etilgen topraqlarında, hususan Qırımda, yerleşken Rusiye işğalli ordularınıñ bir sıra müim obyektlerine ücüm etti.
USQniñ Baş ştabı bu aqqında haber etti.
"Ukrayina VİE Qırımınıñ Ğvardiyskıy rayonında 55J6 "Nebo-U" radiolokatsiya stantsiyasına ücüm qayd etildi", — dep Ukrayina silâlı quvetleriniñ Baş ştabı bildirdi.
Bundan ğayrı, Baş ştabnıñ bildirgeni kibi, Ukrayina mudafaa quvetleriniñ vaqtınca işğal etilgen Zaporijjâ vilâyetiniñ Prımorsk rayonında yerleşken işğalcilerniñ 76-ncı desant-ücüm diviziyasınıñ yaqarlıq-yağ malzemeleri anbarı, bundan ğayrı, Makiyivkada UUAlerni saqlav anbarı ve VİE Donetsk vilâyetiniñ Donetsk şeerinde yerleşken 114-ünci ayrı motoatıcı brigadası zapt etkenlerniñ canlı quvetleriniñ toplaşuv yeri zarar kördi.
Hatırlatamız ki, ilk qış ayınıñ 17-de aqşam ve 18-de gece işğal etilgen Qırımnıñ "Belbek" ve "Qaçı" ava limanları, Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) yanında ve daa bir qaç rayonında patlavlar oldı. İşğalciler AMSnıñ çalışqanı aqqında bildirdiler.
Ukrayina havfsızlıq hızmeti bildirdi ki, ilk qış ayınıñ 18-nde gece "Alfa" mahsus operatsiyalar merkeziniñ uzaq ücüm etici dronlaro işğal etilgen Qırımda "Belbek" arbiy ava limanında Rusiye ava mudafaasınıñ tehnikasını urdı.
Telegram, WhatsApp, Facebook, TikTok ve YouTubede Suspilne Qırım haberlerine abune olıñız
