İşğalli Qırım yolbaşçısı Sergey Aksönov 2026 senesi Qırım köprü ögünde qoşma keçit noqtalarını qurmaq planları aqqında bildirdi.
O, ilk qış ayınıñ 18-nde "Rossiya 24" teşviqiy telekanalına bergen intervyusında bunı bildirdi, dep "Vesti" Rusiye neşiri haber berdi.
"Naqliyat naziri keldi, Andrey Sergeyeviç Nikitin edi. Keçtik, Qırım köpründe qoşma keçit noqtalarını qurmaq imkânlarını daa bir kere baqıp çıqtıq. Ümüt etemiz ki, kelecek mevsimge qadar keçit vaqtını qısqartırmız", — dep qayd etti o.
Hatırlatamız ki, Rusiye naqliyat naziri Andrey Nikitin işğal etilgen Qırımnı ziyaret etken soñ, Yılbaş bayramları arfesinde Qırım köpründe "telükesizlik tedbirleri"ni quvetleştireceklerini bildirdi: 212 qoşma kontrol noqtası açılacaq.
Bundan evel boş ayda işğalciler Keriç köpründe yañı sıñırlavlarnı resmiy beyanat bermeden kirsettiler. Qırımnıñ reintegratsiyası birliginiñ malümatına köre, Rusiye tarafından işğal etilgen Qırımğa, kerçekten yük olaraq çalışqan, amma vesiqalarğa köre yolcu olaraq sayılğan, yerleri çıqarılğan mikroavtobuslar kirsetilmey.
Bundan da ğayrı, 2025 senesi boş aydan başlap elektromobil ve gibrid maşnalarına Keriç ve Taman taraflarından Keriç köprüne kiriş yasaq etildi. Yañı qaidelerni Rusiye akimiyeti "antiterroristik eyyetniñ tevsiyeleri"ne köre kirsetti. Evelden qanunsız keçitniñ keçüvi yük naqliyatı içün sıñırlanğan edi.
Keriç köpründeki patlavlar aqqında ne bilemiz
2022 senesi orta küz ayınıñ 8-nci sabası vaqtınca işğal etilgen yarımadanı Rusiyenen bağlağan Keriç boğazı üzerindeki Keriç köpründe yanğın çıqtı. Eki avtomobil yolları qısmen zarar kördi.
Keriç keçitindeki qanunsız köpürni nasıl yıqacaqsıñız: silâ ya da uquqnenmi? Mütehassıslarnıñ fikirlerini Suspilne Qırım maqalesinde oquñız.
Soñ UHHniñ yolbaşçısı Vasıl Malük mahsus operatsiyanıñ tafsilâtlarını tarif etti. Onıñ aytqanına köre, mahsus hızmet 2022 senesiniñ baarinden berli köpürni patlatmaq ğayesini taşıy edi, bütün bu vaqıt devamında çeşit variantlar baqıldı.
2023 senesi oraq ayınıñ 17-ne keçer gecesi Keriç köpründe patlavlar oldı. Bir qısım yoq etildi, diger qısım zararlandı. Belgorod vilâyetiniñ gubernatorı Gladkov köprüde ölgen erkek ve qadın aqqında bildirdi.
Operatsiya nasıl planlaştırılğanı ve onıñ aqibetleri aqqında — Suspilne Qırımğa UHH ve arbiy mütehassıslar tarif ettiler.
Suspilneniñ uquq qorçalayıcı organlardaki menbalar Keriç köprüne ücüm — UHH ve ADQ mahsus operatsiyası olğanını bildirdi. Mında bildirdiler ki, Keriç köpründe "patlama"nıñ teşkil etilmesi aqqında tafsilâtlar "Ğalebeden soñ aydınlatılacaq".
2025 senesi ilk yaz ayıniñ 3-nde Keriç köprüne ücüm aqqında ne bilemiz
2025 senesi ilk yaz ayınıñ 3-nde UHH işğal etilgen Qırımda suv astı mahsus operatsiyası aqqında bildirdi, onıñ neticesinde Keriç köprüne üçünci kere ücüm yapıldı. Bu ameliyatnıñ neticesinde suv tübündeki tiremeler bayağı zarar kördi. Buña 1 100 kilogramm patlayıcı yardım etti.
Saat 14:45-te Keriç köprüniñ yanında ekinci patlav oldı. Bunı "Ateş" arbiy-partizan areketi bildirdi.
USQniñ Arbiy-deñiz quvetleriniñ spikeri Dmıtro Pletençuk qayd etti ki, köpür qanuniy cenk maqsadı olaraq qala, ve er bir zarar, işğalcilerniñ logistik imkânlarını boza. Daa bir ücüm neticesinde, onıñ vazifeleriniñ bir qısmını, hususan demiryol alâqasını, ğayıp etkenine ümüt etmek sebepleri bar.
Ukrayina prezidenti Ofisiniñ yolbaşçısı Andriy Yermak, UHHniñ Keriç köprüne ücümini izaatlap, Rusiye işğal etilgen yarımadanı arbiy bazağa çevirgenini ve köpür silâ ve tehnikanıñ ketirilmesi içün faal qullanılğanını qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
