İşğal etilgen Qırımda Keriç sakini — Ukrayina havfsızlıq hızmetiniñ sabıq hadimi, deñiz naqliyatı şirketlerinden biriniñ hadimi tutuldı. O, Moskvadaki Qızıl meydanında Ğalebe paradına dron vastasınen ücüm etmege çağıruvlar yapqanında qabaatlana.
Rusiye FSBsiniñ Qırımdaki işğalli idaresi bunı bildirdi, dep ilk qış ayınıñ 16-nda "Novosti Krım" Rusiye teşviqat haber agentligi haber berdi.
"Ukrayina havfsızlıq hızmetiniñ 1962 senesi doğğan pensioneri deñiz naqliyatı müessiselerinden biriniñ hadimi, Telegram kanalında açıq irişimde olğan metin izaatlarını derc etip, Ulu Vatan cenkiniñ (Rusiyeliler Ekinci Cian cenkini böyle adlandıralar — muar.) yekünlenmesiniñ yıllığı munasebetinen Ğalebe paradı keçirilgende Qızıl meydanğa uçucısız uçaq aletleri vastasınen ücüm etmege çağırdı", — dep FSB matbuat hızmetiniñ haberinde qayd etildi.
İşğalciler Qırım sakinine qarşı "İnternette terroristik faaliyetke açıq çağıruvlar" maddesine istinaden cinaiy dava açtılar (RF Ceza qanunnamesiniñ 205.2-nci maddesiniñ 2-nci qısmı). Onı apiske aldılar. Madde 7 yılğa qadar apis cezasını belgiley.
Daa evel Rusiye FSBsi, Ukrayina mahsus hızmetleri tarafından Rusiye arbiy zabitlerinden birine qarşı azırlanğan "Qırımda teraktnıñ ögüni aluvı" aqqında bildirdi. Qayd etilgenine köre, adam tutuluv esnasında öldürildi. QRMniñ reisi Eskender Bariiev bunı "qırımtatarlarnı yoq etmek içün yapılğan sanalaştıruv" ve "yarımada sakinlerini qorquzmaq içün planlaştırılğan öldürüv" dep adlandırdı.
Hatırlatamız ki, 2017-2025 seneleri işğal etilgen Qırımda 10 biñden ziyade insan aqlarınıñ bozuluvı qayd etildi, olardan 6 biñden ziyadesi qırımtatarlarğa qarşı, dep QRMniñ reisi Bariiev bildirdi.
Onıñ aytqanına köre, Rusiye SİZOlarında ve müstemlekelerinde işğalciler 316 Qırım siyasiy mabüsini tutaşar, olarnıñ arasında 176-sı qırımtatar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
