İşğalciler, Bağçasaraydaki Han sarayınıñ "restavratsiyasını" 2027 senesi ilk qış ayında bitirmege planlaştıralar, dep bildirdiler.
Qırımnıñ medeniyet naziriniñ muavini Olğa Vorobyova bu aqqında bildirdi, RİA Novosti Qırım dep yaza.
Onıñ aytqanına köre, leyhanıñ fiyatı — 4 milliard rubleden ziyadedir, kompleks terkibine 16 obyekt kire — olardan 12-si ğayrıdan tiklendi.
"Remont-restavratsiya işleri esas ve graf korpuslarında, han aşhanesinde ve "bağça ve park inşaatları" obyektinde devam ete", — dep Vorobyeva qoştı.
Hatırlatamız, saraynıñ "restavratsiyası" 2017 senesi başlandı ve işlerni 2024 senesiniñ soñunda bitirmege planlaştırıla edi. 2025 senesi yanvar ayında RİA "Novosti Qırım" neşiriniñ tefsirinde Qırımtatar tarihı ve medeniyeti müzeyiniñ işğalci müdiri Meryem Seyitumerov, arheologik qazma işleri sebebinden esnas sozulğanını bildirdi.
"Tarihiy resimni yoq etüv — qırımtatarlarnıñ milliy hatıralarına daa bir darbe. Hansaray umumdünya emiyeti olğan tarih ve medeniyet abidesi, qırımtatarlarnıñ tarihı, medeniyeti ve devletçiliginiñ timsali ola. Bu, dünyada bugünge qadar saqlanıp qalğan qırımtatar saray mimarlığınıñ yekâne nümünesidir", — dep QMC reisiniñ temsilciliginde bildirdiler.
Bundan evel "Bağçasaraydaki Han sarayı" müzey kompleksiniñ sabıq müdiri Elmira Ablâlimova-Çiygoz Suspilne Qırımğa işğalciler saraynı çoq bozuluvı ile tamir etkenini aytqan edi.
Hususan, 2025 senesi saban ayında Qırım reintegratsiyası derneginiñ Facebook saifesinde, işğalciler Bağçasaraydaki Han sarayındaki qadimiy freskanı yoq etkenleri aqqında haber etilgen edi. İşni yapqan qurucılar, bu eski plastina olğanını tüşüne ve örtüvni çetke çektiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
