BMTniñ uquq qoruyıcılar meseleleri boyunca mahsus maruzacısı Meri Loulor işğal etilgen Qırımda uquq qoruyıcılarnıñ taqip etilmesini toqtatmağa çağırdı. Onıñ aytqanına köre, yarımadada aq qorçalayıcılarğa qarşı basqı er yıl arta.
Meri Loulor ilk qış ayınıñ 12-nde X ağında bu aqqında yazdı.
"Qırımdan, uquq qoruyıcı advokatlar Lilâ Gemeci, Rustem Kamilov, Edem Semedlâyev, Nazim Şeyhmambetov ve Emil Kurbedinovnıñ ofislerinde tintüvler keçirilgeni, gizli malümat baqılğanı, bir qısmı tutıp alınğanı aqqında qasevetlendirici haberler alam. Terrorizm ile bağlı cinayetlerde iştirak etkenleri aqqında bildirüvler meni pek qasevetlendire. Qırımdaki uquq qoruyıcılar yıllar devamında artan basqılarğa oğray. Olarnıñ taqip etilmesi toqtatılmalı", — dep o yazdı.
Hatırlatamız, ilk qış ayınıñ 11-nde işğal etilgen Simferopolda (AqmescitteRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) işğal "Ekstremizmge qarşılıq merkeziniñ" hadimleri ve mahsus hızmetçiler Edem Semedlâyev, Emil Kurbedinov, Nazim Şeyhmambetov, Elvina Semedlâyeva, Rustem Kamilyev ve Lilâ Gemeci faaliyet köstergen advokatlar gruppasınıñ eki ofisine tintüvlernen keldiler.
İlk qış ayınıñ 12-nde 10 ukrayin teşkilâtı 2025 senesi ilk qış ayınıñ 11-nde işğal etilgen Qırımda advokatlarnıñ evlerinde keçirilgen qanunsız tintüvler sebebinden çetel devletlerniñ ükümetlerine ve halqara teşkilâtlarğa muracaat etti.
Beyanat ZMINA insan aqları merkeziniñ saytında derc etildi.
"İşğal etilgen Qırımda advokat ve uquqçılarğa qarşı repressiyalarnı sert bir şekilde takbih etmek ve Rusiye işğalci akimiyetinden olarğa qarşı qanunsız basqı ve taqip usullarını qullanuvnı toqtatmağa talap etmek, RF-den advokat faaliyetiniñ serbestligini kefil etken "Advokatlarnıñ rolü aqqında esas qaidelerni" yerine ketirmesini talap etmek, işğal etilgen Qırımda insan aqlarınıñ qaba bozuluvı içün mesüliyetli olğan şahıslarğa qarşı şahsiy sanktsiyalar kirsetmek, hususan, TSPE hadimlerine, "mahkemeciler" ve "advokatlarnı siyasiy taqip etüvnen oğraşqan taqiqatçılarğa qarşı", — dep beyanatta aytıla.
Yuqarı Şuranıñ insan aqları vekâletlisi Dmıtro Lubinets de işğal etilgen Qırımda repressiyalar vaziyeti kerginleşkenini bildirdi.
Onıñ aytqanına köre, Qırım Merkeziy kollegiyasınıñ ofisinde keçirilgen soñki tintüvler ve dava malümatlarınıñ tutıp alınması "yarımadada uquqiy qoruv sistemasınıñ maqsatlı bozuluvını" köstere.
İşğal etilgen Qırımda advokatlarnıñ taqipleri
2023 senesi orta küz ayınıñ 13-nde ruslar advokat Oleksiy Ladinni tuttılar. Tintüv ve yaqalav vaqtında ondan advokat sırını taşığan malümat alındı. Ladin 14 künge "yasaqlanğan timsallerni numayış etkeni" içün apiske alındı ve içtimaiy ağda cenkke qarşı yazısı içün para cezasını aldı. Qırımnıñ işğalli polisi apiske alınğan advokatnıñ uquqiy faaliyet litsenziyasını lâğu etmege rica etti.
2022 senesi arman ayında Çeçenistan Advokatlar palatası qırım advokatları Lilâ Gemeci, Rustem Kâmilev ve Nazim Şeyhmambetovnı ihtisasiy statusından marum etti. Bu sebepten olar cinaiy işlerde iştirak etip olamaylar.
2022 senesi mayıs ayında işğalciler eki imayecini tuttılar: Emine Avamileva beş kün apiske alındı, Ayder Azamatov sekiz künge apiske alındı. Ekisi de makemege Nazim Şeyhmambetovnı qorçalamaq içün kelgenlerinde yaqalandı.
2023 senesi mayısnıñ 26-nda işğal etilgen Qırımda "makeme" advokat Edem Semedlâyevni "Rusiye Silâlı quvetleriniñ itibarını tüşürüvde" qabaatlı tanıdı. Advokat 75 biñ ruble para cezasını aldı.
Advokat Emil Kurbedinovnı kiçik aynıñ 15-ne qadar eki kere tuttılar: 2017 ve 2018 seneleri.
2023 senesi çiçek ayınıñ 15-nde işğalciler qırım advokatları Lilâ Gemeci ve Rustem Kâmilevniñ advokatlıq litsenziyasını lâğu ettiler, şunıñ içün olar öz imayesi altındaki şahıslarnı cinaiy davalarda qorçalap olamay, olarnıñ menfaatlarını makemege qadar taqiqat ve makemelerde temsil etip olamay. Olarnıñ arasında 13 qırım siyasiy mabüsi bar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
