Qırım işğal etilgen soñ deñiştirüvler çerçivesinde 12 Qırım siyasiy mabüsi azat etildi. Sekiz kişi tolu miqyaslı istilâdan evel azat etildi, dörtü — soñ.
"Qırım qavuslar arasındamı? Qırım siyasiy mabüslerini azat etmek mümkünmi?" matbuat konferentsiyasında Qırımtatar resurs merkeziniñ idare reisi Eskender Bariiev bunı bildirdi.
Onıñ aytqanına köre, Rusiye deñiştirüv muzakerelerinde qırımtatarlar aqqında laf etmege istemey — bunı ukrayin tarafı tasdıqladı.
"Mayıs ayında Ukrayina prezidenti ile körüşkenimizde, o dedi ki, rusiyeliler jurnalistler, qırımtatarlar ve azavtılar aqqında laf etmege istemeyler. Şunıñ içün deñiştirüv muzakerelerinde iştirak etken er keske muracaat etemiz: er bir deñiştirüvde Qırım sakinleri ve tamır qırımtatar halqınıñ vekilleri olmalı. Bu yalıñız adalet meselesi degil — işğal etilgen topraqlarda yaşağan semetdeşlerimiz içün ümüt meselesi", — dep Bariiev ayttı.
Devlet malümatqa irişim sıñırlanğan şaraitte çalışa, amma qanunsız tutulğan ukrayinlerniñ azat etilmesini talap etmege devam ete, dep matbuat konferentsiyası vaqtında Qırım MC ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ sakinleriniñ aqları vekâletlisiniñ temsilcisi Elvin Kadırov bildirdi.
"Ofisimiz vaqtınca işğal etilgen Qırımda insan aqlarınıñ bozuluvını daima qayd ete. Bu malümat halqara muracaat ve aq qorçalayıcı teşebbüslerniñ temeli ola. Siyasiy sebeplerden tutulğan vatandaş reineleri meselesi daima köterile. Devlet organları ve halqara ortaqlarımıznıñ birleşken ğayretleri sayesinde 160 vatandaş esirini qaytarıp oldıq", — dep ayttı o.
Elvin Kadırovnıñ aytqanına köre, qanunsız tutulğan ukrayinalılarnıñ kerçek sayısı resmiy esaplardan bayağı çoq ola bile.
"Rusiyede tutulğan vatandaşlarnıñ sayısı aqqında resmiy malümat yoq. Amma raqamlar 30 biñden başlay — ve, menimce, daa çoq. Mahkeme esnası yañıdan başlağan soñ, biz Türkiye ombudsmanına muracaat etip, vatandaş reineleri ve ağır hastalar cedvellerini berdik. Olarnıñ azat etilüvi ya da tibbiy yardımğa irişim meselesi Rusiye tarafından köterildi — ve biz cevap bekleymiz", — dep Elvin Kadırov ayttı.
Uquq qorçalayıcı ve QRMniñ mütehassısı Volodımır Lâşenko qayd etti ki, azat etilgen siyasiy mabüslerniñ çoqusı işğal etilgen Qırımnı ya da Rusiye toprağını terk etip olamay, çünki ukrayin vesiqaları yoq ve işğalciler olarnı Ukrayina vatandaşları olaraq tanımağanlar.
"Bu kerçekten de pek qıyın bir mesele, ve Qırım işğaliniñ 12-nci yılından berli devam etkeninen doğrudan bağlı. Ukrayinada şahısnı belgilev sisteması 2016 senesinden berli Yekâne demografik cedvelge bağlı, Qırımlılarnıñ çoqusı aqqında ise bu cedvelde malümat yoq", — dedi Lâşenko.
Hatırlatamız ki, QRMniñ malümatına köre, ilk qış ayınıñ 10-na qadar Rusiye SİZOlarında ve müstemlekelerinde 325 Qırım siyasiy mabüsi tutula, olardan 42-si — qadın.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
