Qırımda işğalciler Niyara Ersmambetovanı qanunsız surette "devlet hainligi" içün mahküm ettiler. Oña umumiy rejimli müstemlekede 15 yıl ve daa bir buçuq yıl azatlıqtan marum etüv cezası berildi. "Mahkeme oturışı" qapalı şekilde keçirildi.
Qırımtatar resurs merkezi bunı bildirdi.
"Qadını "ATEŞ" partizan areketinen işbirlikte, yaqarlıq terkibi ve AMSnıñ mevamı aqqında malümat berüvde qabaatladılar. Soñki munaqaşalarda qabaatlayıcı 18 yıllıq apis cezasını istedi, amma eki künlik oturıştan soñ "mahkemeciler" müstemlekede 15 yıl ve bir buçuq yıl sıñırlav cezasını berdiler", — dep haberde qayd etildi.
QRMniñ malümatına köre, qadın Biloğirsk (Qarasuvbazar) rayonı aphanesinde provizor olıp çalıştı. İşğalli quvetçiler onı anasınıñ cenazesinden yedi kün keçken soñ, 2025 senesi mayıs ayında tuttılar. Niyaranıñ eki balası bar — 9 yaşındaki qızı ve 16 yaşındaki oğlu. Şimdi olar qartbabasınen yaşaylar, Niyaranıñ babası 70 yaşında ve ekinci derece saqat — apiske alınğanına qadar Ersmambetova bütün qorantanı baqqan edi.
İşğalli "Qırım Yuqarı mahkemesi"niñ saifesinde bu "mahkeme baqıluvı" aqqında malümat 2025 senesi boş aynıñ 19-nda derc etilgen yazıda bar. İşğal etilgen Qırım sakini üzerinde "mahkeme oturışı"nıñ ne vaqıt keçirilgenini ögrenmek imkânsızdır. "Mahkeme oturışı qapalı şekilde keçti", — dep haberde bildirildi, — "devlet sırlarını taşığan malümat sebebinden". İşğalli mahkeme organınıñ bildirüvinde qayd etildi ki, qadın "devlet hainligi"nde qabaatlandı.
"Mahkeme, qabaatlanğan qadınnıñ areketlerini Rusiye Federatsiyası Ceza qanunnamesiniñ 275-inci maddesine istinaden (Rusiye Federatsiyasınıñ 28.04.2023 tarihlı Federal qanunınıñ redaksiyasında) — devlet hainligi, yani Rusiye Federatsiyası vatandaşı tarafından yapılğan casuslıq — Rusiye Federatsiyasınıñ silâlı quvetlerine qarşı qullanıla bilecek malümatnı toplav, berüv olaraq tanıdı. Mahküm etilgenniñ çağına yetmegen balaları yaqın soy-soplarına berilecek. Cinaiy davanıñ baqılması qapalı mahkeme oturışında keçti, çünki dava malümatında devlet sırı olğan malümat bar", — dep haberde bildirildi.
Bundan evel "Tribunal. Qırım epizodı" uquq qorçalayıcı teşebbüsi qayd etti ki, Niyara Ersmambetovanıñ vaqiasında halqara gumanitar uquqına köre cenk cinayeti olaraq tanıla bilecek qanunsız azatlıqtan marum etüv alâmetleri bar.
"Bu, yarımadada soñki yarım yılda devlet hainligi ya da diversiya azırlağanında qabaatlanıp tutulğan eñ az otuzıncı adisedir. Apiske alınuvlarnıñ miqdarı, işkence qullanuvınıñ tarqalması, mustaqil advokatlarnıñ yoqluğı ve bu kibi qabaatlavlar boyunca mahkeme esnasları qapalı olğanı sebebinden qabaatlavlar şübeli körüne. Ve mında qanunsız azatlıqtan marum etüvniñ alâmetleri bar, bu ise cenk cinayeti sayıla", — dep "Tribunal. Qırım epizodı" qayd etti.
"Qırımtatar Resurs Merkezi işğal etilgen Qırımda Niyara Ersmambetova ve diger Ukrayina vatandaşlarınıñ qanunsız taqip etilüvini qatiyen takbih ete. Bu kibi areketler siyasiy sebepli ola ve işğalli Rusiye qurulışları tarafından ealini qorquzmaq içün qullanıla. QRM halqara toplulıqnı işğal etilgen Qırımdaki vaziyetke diqqat ayırmağa ve qanunsız tutulğan bütün Ukrayina vatandaşlarınıñ deral azat etilmesini talap etip, Rusiyege qarşı basqını quvetleştirmege çağıra", — dep QRMniñ beyanatında qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
