Devletke 7 biñden ziyade arheologik eser berildi — bu, memleketniñ müzey fondlarını toldurğan eñ büyük kollektsiya oldı. Tapılğanlarnıñ bir qısmı Qırımdan ve diger tarihiy bölgelerden kele, qıymetli şeyler ise sabıq Qırım memurına dair tahqiqat vaqtında tapıldı.
Baş prokurornıñ ofisi Telegramda bunı bildirdi.
Uquq qorçalayıcılar 7 biñden ziyade unikal arheologik eser, aqça ve silânı tutıp aldılar, olarnıñ umumiy fiyatı millionlarnen dollarnı teşkil ete. Bütün artefaktlar Ukrayina tarihı milliy müzeyine berildi — bu mustaqillik tarihında devlet müzey fondınıñ eñ büyük qoşuluvıdır.
Berilgen eserler arasında:
- Qırım, Bizans, Kıyiv Rusi ve Altın Ordunıñ yunan şeerleriniñ 5000-den ziyade qadimiy aqçası;
- Qadimiy yunan keramikası ve 3-4 biñ yıllıq cam savut;
- Skit, Bizans, Skandinaviya ve Yaqın Şarqtan silâ, şu cümleden Ukrayinada yekâne olğan Bizans qılıcı;
- qadimiy migferler, kolçugalar, ilvanlar, er künlik eşyalar ve siyrek olğan ateş aletleri.
Baş prokurornıñ ofisi qoştı ki, arheologik eserler buña uyğun olmağan yerlerde saqlana edi — çatılarda ve atta elektrik odada. Olarnı Qırım MC Nazirler Şurasınıñ sabıq yolbaşçısına qarşı cinaiy dava boyunca tintüv vaqtında taptılar.
Tahqiqat, memurnıñ "qara arheologlar"dan alınğan eserlerni qanunsız saqlağanını belgiledi. Mahkemeden evelki tahqiqat vaqtında sabıq memur qabaatını tanıp, bütün arheologik kollektsiyanı devletke bermege razı oldı, tahqiqatçılar tarafından alınmağan eserler de kirsetildi.
"Berilgen eşyalarnıñ bir qısmı Ukrayina içün unikal ola — müzey fondlarında bile olarnıñ musaviyleri yoq. Şunıñ içün olarnıñ qaytarıluvı milliy medeniy mirasnıñ saqlanmasında müim bir adım ola", — dep prokurorlıq bildirdi.
Hatırlatamız ki, Ukrayina havfsızlıq hızmeti "O.S. Puşkin adına devlet bediiy sanat müzeyi" Federal devlet bücet medeniyet müessisesiniñ "Bospor ekspeditsiyası" reberi Volodımır Tolstıkovnı qıdıruvğa ilân etti. Onı Qırımda qanunsız qazma işlerinen qabaatlaylar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
