Ukrayina Silâlı quvetleriniñ mahsus operatsiyalar quvetleri (MOQ) işğal etilgen Qırımdaki Çavda burnu yanında Şahed türü ücüm uçaq aletleriniñ saqlav ve uçuruv rayonına ücüm etti.
İlk qış ayınıñ 1-nde USQniñ MOQniñ komandanlığı Facebookta bu aqqında haber etti.
"Duşman Qırımnıñ cenübinde qayd etilgen topraqnı Ukrayina vatandaş astyapılarına çeşit türlü UUAni uçurmaq içün daimiy sürette qullana. Mahsus operatsiyalar quvetleri Rusiye ordusınıñ ücüm qabiliyetini bozmaq içün asimetrik areketlerni qullanmağa devam ete", — dep haberde qayd etildi.
Daa evel Ukrayina Arbiy-deñiz quvetleri işğal etilgen Qırımdaki Saq ava limanında Rusiye komandanlıq-dispetçer noqtası, uçucısız uçaq aletleriniñ saqlanuv yerleri ve AMSnıñ bir qaç obyektine ücüm videosını kösterdi.
Bundan evel Ukrayina mahsus operatsiyaları quvetleri, orta küz ayınıñ 17-ne keçer gecesi işğal etilgen Qırımda "Ğvardiyskıy" kombinatı ve neft bazası zarar körgenini bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
