Ekim ayına qadar Qırımdaki uquq qoruyıcı ve faallerge qarşı 26 cinaiy iş açıldı. Umumen Rusiye yarımadadan qırqtan ziyade qadınnı qanunsız alda tuta.
Bu aqta er yıl boş aynıñ 29-nda qayd etilgen Halqara aq qorçalayıcı qadınlar kününde "Qırım platforması" saytı bildire.
"2022 senesiniñ istilâsından evel Qırımnıñ siyasiy mabüsleri arasında tek 5 qadın olsa, 2025 senesi ekim ayına qadar olarnıñ sayısı 40-tan ziyade oldı, qadın faallerge qarşı umumen 26 cinaiy dava qayd etildi. Rusiye quvetçileri tek taqip etmey — olar qorqu müitini yaratalar. Ev tintüvleri sıq-sıq gece ya da saba erte keçirile, telükeler ve zorbalıqnen, hususan siyasiy mabüslerniñ anaları ve apaylarına qarşı", — dep haberde aytıla.
Rusiye tarafından taqip etilgen uquq qoruyıcılar arasında İrına Danılovıç bar: Rusiye işğalcileri tarafından qanunsız alda hırsızlanğan ve apiske alınğan Qırımlı ukrayin vatandaş jurnalisti, uquq qoruyıcı ve ekimi, dep "Qırım platforması" yaza.
"İrına Danılovıç cesürligi, uquq qorçalayıcı faaliyeti ve mustaqil jurnalistiq içün bir sıra halqara mukâfatlarnen taqdirlendi, şu cümleden Avropa hatıra ve vicdan platforması mukâfatı (2025) ve People in Need Çehiya teşkilâtınıñ "Adalsızlıq ikâyesi" mukâfatı. İrına acınacaqlı şaraitlerde tutula ve kerekli tibbiy yardım körmey. Eñ azından bir mikroinsult keçirgen, şiddetli baş ağrısı, qulaqlarında gürültü ve sol qulağında eşitüv qabiliyetini bütünley ğayıp etken. Sağlığı kritik olğanına baqmadan, koloniya memuriyeti şikâyetlerni körmemezlikke ura", — dep haberde aytıla.
Qırımnıñ daa bir siyasetçisi — İrına Ğorobtsova.
"2022 senesi casuslıq yapqanı içün 10,5 yılğa üküm etildi. Eki balanıñ anası olıp, o, gumanitar yardım koordinatorı ve arbiy cinayetlerni vesiqalandırğan edi. Mordoviyadaki koloniyada kerekli tibbiy yardımsız qala", — dep "Qırım platforması" yaza.
Qırımtatar uquq qoruyıcısı ve jurnalisti Lütfiye Zudiyeva 2025 senesi qural ayında "çetel agentleri" cedveline kirsetildi.
"Materiallarnı ögrengen soñ, bu planlaştırılğan iş olğanını kördim. Eki yıl devamında FSB ve Ekstremizm ile küreş merkeziniñ hadimleri esabatlarnı, yazılarımnıñ ve intervyülarımnıñ ekran süretlerini bereler, közeteler. Bu, yazılarğa ya da maqalelerge öz-özünden berilgen bir cevap degil. Bu, evelden azırlanğan ve 2025 senesi qural ayında işke tüşürilgen sistemalı bir qarar edi", — dep jurnalist "Sotsialnıy Qırım" neşirine bergen intervyüsında tarif etti.
Hatırlatamız, Qırımtatar Maaliy Merkeziniñ malümatına köre, 2014 senesinden başlap işğal etilgen Qırımda qadınlarğa nisbeten eñ azından 63 cinaiy taqip qayd etildi.
"41 adise soñki eki yıl içinde qayd etildi, bu ise Rusiye işğalci organları tarafından qadınlarğa yapılğan basqınıñ artqanını köstere", — dep QRM yaza.
QRM malümatına köre, soñ eki yıl içinde — 2024—2025 seneleri — on qadın endi doğurıldı ve koloniyada buluna.
1. Alina Ğrek
2. Ğrekova Nadiya
3. Cemilova Lera
4. Yeltsova Ğanna
5. Kolkova Olğa
6. Svetlişına Kseniya
7. Senecuk Oksana
8. Strilets Viktoriya
9. Strilets Oleksandra
10. Tımoşenko Nina
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
