Nikaragua parlamenti işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Donetsknen iqtisadiy ve ticaret munasebetleri aqqında añlaşmalarnı bir ağızdan uyğunlaştırdı.
Nikaragua Milliy assambleyasınıñ matbuat hızmetine esaslanıp, RİA "Novosti" bu aqqında haber berdi.
"Biz, 81 yıldır şartsız dostumız olğan ve birdem işdelik yapqanımız Rusiye Federatsiyasınıñ ağa-qardaş halqları olğan Donetsk cumhuriyeti ve Sevastopol ükümetinen işdeşlik aqqında añlaşmalarnı bir ağızdan uyğunlaştırdıq", – dep parlamentniñ saytında qayd etildi.
İşğal etilgen Sevastopol (Aqyar) ükümetinen añlaşma çerivesinde tasil, tehnologiyalar, medeniyet, etraftaki müitni qoruv, mesken, sport ve turizm saalarındaki işdeşlikni köz ögünde tuta.
Hatırlatamız ki, Ukrayina Nikaraguanen diplomatik munasebetlerini toqtattı. Bu memleket vaqtınca işğal etilgen Qırımnı, Luğansk, Donetsk, Zaporijjâ ve Herson vilâyetlerini Rusiye olaraq tanıdı.
Tış işler nazirligi, Nikaragua, Ukrayinanen diplomatik munasebetlerniñ qurulması aqqında vesiqalarda belgilengen mecburiyetlerni bozğanını bildirdi, vesiqalarda, hususan, Nikaragua ükümeti Ukrayinanen diplomatik munasebetlerniñ qurulması ve saqlanılması teklifini qabul etkenini qayd ete, "o, dostluq, işbirlik ve qarşılıqlı sayğı printsiplerine, em de Birleşken Milletler Teşkilâtınıñ nizamnamesine ve halqara uquqnıñ umumiy qabul etilgen qaidelerine esaslanacaq".
"Bu ciddiy diplomatik adım — Ukrayina öz suvereniteti ve topraq bütünligine qarşı yapılğan er angi ıntıluvlarğa eñ sert şekilde cevap bermege devam etecegini köstere. Bizler devletimizge qarşı bir de bir istilâğa yol bermeycekmiz ve mustaqilligimiz, havfsızlığımız ve sıñırlarımıznıñ toqunılmamasını qorçalamaq içün bütün kerekli tedbirlerni alacaqmız", — dep Ukrayina tış işler naziri Andriy Sıbiğa qayd etti.
Nikaragua Cumhuriyeti — Merkeziy Amerikada bir memleket. Merkeziy Amerika devletleri arasında eñ balabandır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
