İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) Rusiye quvetçileri 57 yaşındaki bir adamnı yaqaladılar. İşğalciler onı "terakt azırlağanı"nda qabaatlaylar. O, Rusiye flotunıñ 300 yıllığı munasebetinen yapılğan işaretniñ yanında patlayıcı patlatmaq niyetinde edi.
Rusiye devlet agentligі TASS, işğalli "FSB idaresi"niñ malümatına esaslanıp, bunı bildirdi.
"Ukrayina "nazist" mefküresiniñ tarafdarı olıp, Rusiye flotunıñ 300 yıllığı munasebetinen yapılğan patlav aletini patlatmağa planlaştıra edi", — dep haberde qayd etildi.
İşğalli FSB qayd etti ki, adam Vinnıtsâ vilâyetinde doğdı ve tahqiqat malümatına köre, ileride ukrayin internet resurslarında yerleştirmek içün RF Mudafaa nazirliginiñ arbiy obyektleri ve Ukrayina Silâlı quvetleriniñ raketa ücümleriniñ aqibetleri aqqında malümat toplay edi.
"Ealini qorquzmaq maqsadınen Sevastopolda Rusiye flotunıñ 300 yıllığına bağışlanğan hatıra tahtası yanında öz başına yapılğan patlayıcı cihaznı patlatmağa planlaştıra edi. O, patlayıcı yapmaq içün talimatlarnı ögrendi, kerekli malzemelerni satın aldı ve qarışıq patlayıcığa esaslanğan radioaktiv parçalayıcı aletni qurdı. Onı tevqif etüv şeklinde tedbir alındı", — dep işğalli quvetçiler bildirdiler.
Erkekke qarşı Rusiye Federatsiyası Ceza qanunnamesiniñ 222.1-nci maddesiniñ 1-inci qısmı (patlayıcı aletlerniñ qanunsız saqlanması) ve Rusiye Federatsiyası Ceza qanunnamesiniñ 30-ncı maddesiniñ 1-inci qısmı, 205-inci maddesiniñ 3-ünci qısmı (terakt azırlavı) boyunca cinaiy dava açıldı. Oña ömürlik apis cezası berile bile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
