OON Baş Assambleyasınıñ Üçünci komiteti baş aynıñ 19-nda Ukrayinanıñ vaqtınca işğal etilgen topraqlarında, hususan Qırımda insan aqları vaziyeti aqqında yañartılğan yıllıq qarar leyhasına qol tuttı. Vesiqada Rusiye tarafından vatandaşlar, jurnalistler, arbiy esirler ve tamır halq vekillerine qarşı yapılğan muntazam bozuvlar qayd etile.
Ukrayina prezidentiniñ Qırım Muhtar Cumhuriyetindeki temsilciligi bu aqqında bildire.
78 memleket vesiqanıñ tarafını aldı, aksine Belorusiye, Burkina Faso, Burundi, Merkeziy Afrika Cumhuriyeti, Qıtay, Kongo, Kuba, Eritreya, İran, Mali, Nikaragua ve Rusiye qoltuttılar.
Rezolütsiyada qayd etile ki, Rusiye insan aqlarını ve halqara gumanitar uquqnıñ qaidelerini boza. İşğal etilgen topraqlarda repressiyalar, işkence, jurnalist, uquq qoruyıcı ve tamır halq vekilleriniñ qanunsız apiske alınuvı ve taqip etilüvi aqqında söz yürsetile.
Yañartılğan vesiqa işkence ve zorbalıqnen bağlı bloknı pek quvetlendire. OON, Rusiye tarafından azatlıqtan marum etilgen yerlerde qanunsız tutulğan ukrayin arbiy esirleri ve vatandaşlarına yapılğan muntazam işkencege işaret ete. Rezolütsiyada ukrayinalılarnıñ hırsızlanuvı, işkence ve zorbalıqnen ğayıp oluvı boyunca halqara tahqiqatlarnıñ neticeleri köz ögüne alındı. Vesiqada Rusiyeden qanunsız tutulğan şahıslarnıñ qorantalarına olarnıñ taqdirleri ve bulunğan yerleri aqqında malümat bermesini talap etile.
Rezolütsiyada OON Baş kâtibiniñ Rusiyeniñ çatışma vaqtında cinsel zorbalıq yapqan memleketler cedveline kirsetilmesi mümkün olğanı aqqında tenbiyelemesi qayd etile. Rusiye endi üçünci yıl devamında Ukrayina balalarınıñ aqlarını bozuvı sebebinden böyle cedvelde buluna.
İlk qış ayında vesiqa OON Baş Assambleyasınıñ soñki tasdıqlaması içün taqdim etilecek.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
