Menlik ve Azatlıq Kününde "Akademik Vernadskiy" stantsiyasından ukrayin polarcıları işğal etilgen topraqlarnıñ sakinlerine qol tutmaq ve Rusiye tarafından ukrayin alimleriniñ taqip etilmesine diqqat çekmek içün "Sarı şerit" areketine qarşı aktsiyağa qoşuldılar.
Areket Telegramda bu aqqında bildirdi.
"Donetsk, Luğansk, Qırım, Zaporizhzhâ ve Herson vilâyetleri — Ukrayina. Menlik ve Azatlıq Kününde bunı daa bir kere Antarktikadan — "Akademik Vernadskiy" stantsiyamızdan hatırlatamız", — dep areketniñ faalleri qayd ettiler.
30-ncı Ukrayina Antarktika ekspeditsiyasınıñ polarcıları işğal etilgen topraqlarda ukrayinlerge, hususan zorbalıqsız qarşılıq köstermege devam etkenlerge qol tutmağa istegenlerini qayd ettiler.
"Ukrayinadan 15 biñ kilometr uzaqta olsaq da, sizlernen berabermiz. Hatırlaymız ve küçümizni, inancımıznı ve ümütimizni coymamaqnı rica etemiz. Ukrayina — ğalebe qazanacaq", — dep qutupçılar muracaat ettiler.
"Sarı şerit" areketi hatırlattı ki, bu sene ilk küz ayında Qırımda Rusiye quvetçileri ukrayin deñiz ayatiyatçısı Leonid Pşenıçnovnı devlet hainliginde qabaatlap yaqaladı. O, Rusiye Federatsiyasınıñ Cenübiy okean siyasetine qarşı çıqqanı içün belli. O, Antarktika ile alâqalı olğan tarihta ilk siyasiy mabüs oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
