Vaqtınca işğal etilgen Herson vilâyetiniñ Geniçesk rayonınıñ işğalli mahkemesi 33 yaşındaki adamnı Rusiyede qanunsız silâlı birleşme (QSB) olaraq tanılğan Noman Çelebicihan qırımtatar göñülli batalyonında iştirak etkeni içün sert rejimli müstemlekede 9 yılğa üküm etti. Onı "halqara qıdıruv"ğa ilân ettiler.
Rusiye FSBniñ Qırımdaki İdaresi bunı bildirdi, dep boş aynıñ 19-nda RİA "Novosti Krım" Rusiye teşviqat haber agentligi haber berdi.
Taqiqatnıñ versiyasına köre, 2015 senesi ilk qış ayında mahküm etilgen adam bu batalyonğa "göñülli olaraq qoşuldı".
"O, nezaret hızmetini eda ete, Ukrayina ve Rusiye Federatsiyası arasında devlet sıñırında naqliyat vastalarını nezaret ete, em de Herson vilâyetiniñ Geniçesk rayonınıñ Çonğar mesken yeri yanında qanunsız silâlı birleşmelerniñ obyektlerini qoruy edi. Aynı zamanda adam şimdilik öz isteginen QSBnde iştirakini toqtatqanını bildirmedi", — dep haberde qayd etildi.
İşğalciler onı Rusiye Ceza qanunnamesiniñ 208-inci maddesiniñ "çetel devletniñ toprağında RF menfaatlarına zıt kelecek maqsatlarnen QSBnde iştirak etüv" 2-nci qısmına istinaden mahküm etti. 9 yıllıq apis cezasından ğayrı, oña 2 yıllıq azatlıqtan marum etüv cezası berildi, ilk eki yılını apishanede keçirmeli.
Hatırlatamız ki, aynı şu ay Herson vilâyeti "mahkemesi" 31 yaşındaki erkek ve 49 yaşındaki qadınnı "Noman Çelebicihan adına qırımtatar batalyonında iştirak etkeni" içün qanunsız olaraq ğıyabiy şekild mahküm etti ve "halqara qıdıruvğa ilân etti".
Daa evel Qırımtatar resurs merkezi bildirdi ki, 2014 senesinden başlap işğalciler Noman Çelebicihan batalyonında iştirak etkeni içün 70 Ukrayina vatandaşını yaqaladılar: 21-i — işğal etilgen Qırımda, 49-ı — 2022 senesi kiçik aynıñ 24-nden soñ işğal etilgen Herson vilâyetinde.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
