17 yılğa mahküm etilgen Qırım siyasiy mabüsi Rustem Emiruseinovnıñ tişleri fenalaştı, ve o acele surette bütünley protezlenmege muhtac.
Orta küz ayınıñ soñunda aqayını Tver vilâyetiniñ Bejetsk şeerindeki 6-ncı müstemlekede ziyaret etken onıñ apayı Aliye "Qırım birdemligi"ne bunı bildirdi.
Onıñ aytqanına köre, Rustem Emiruseinovnıñ tiş meseleleri apiske alınmazdan evel de bar edi, amma cezalandıruv müessiselerinde olar daa beter oldı. Saratov apishanesinde onıñ ast çengesine protez qoyuldı, çünki "tişleri yıqıla edi ve olarnı çıqarmaq kerek edi". Şimdi, Aliye qayd etti ki, üst çenge tişleri bütünley yoq etildi, yalıñız tsmırları qaldı, olarnı çıqarmaq kerek.
"Aşağı çenge protezi de hasta bir tişte tutula. Eger de onı çıqarsalar, Rustem bir şey aşayamaz, ve bu meni pek qasevetlendire. Vaziyet pek qıyın. Onıñ şeker hastalığı bar, ve apishanede aşaycaq aşnı aşamaycaq olsa, aşqazan ve bağırsaq meseleleri peyda olacaq", — dep Aliye tarif etti.
Rustem Emiruseinov aqqında ne bilemiz
Rustem Emiruseinov — qırımtatar, çoq balalı baba ve Qırımnıñ Krasnogvardiysk (Qurman) rayonından iş adamı. O, 2019 senesi kiçik aynıñ 14-nde Eskender Abdulganiyev ve Arsen Abhayırovnen beraber "Hizb ut-Tahrirniñ Qurman gruppası davası" çerçivesinde tutuldı.
2020 senesi boş aynıñ 3-nde Cenübiy bölgeniñ arbiy mahkemesi Emiruseinovnı 17 yılğa, Abdulganiyevni — 12 yılğa, Abhayırovnı — 13 yılğa mahküm etti. 2021 senesi boş aynıñ 1-nde Vlasis istinaf mahkemesi ükümni amelde qaldırdı.
Üçü de Rusiyede yasaq etilgen ve 2003 senesi Rusiye Yuqarı mahkemesiniñ terroristik qararınen tanılğan Hizb ut-Tahrir islâm siyasiy firqasında iştirak etkeninde qabaatlandı. Ukrayinada teşkilât yasaq etilmedi.
İmayeci ve mahküm etilgen şahıslar dava uydurılğan dep sayalar, çünki delil olaraq diñlev ses yazıları, diniy edebiyat ve anonim şaatlarnıñ ifadeleri qullanıldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
