"Sarı şerit" areketiniñ iştirakçileri işğal etilgen topraqlarda balalar Rusiye teşviqatına qarşı narazılıq bildirgenini bildire. Narazılıqnı toqtatmaq içün mekteplerde "propagandalı" tedbirlerniñ sayısı arttı.
Areket Telegramda bu aqqında bildire.
"Sarı şerit" areketiniñ faalleri bildire ki, balalar Rusiye propagandasına qarşı narazılıq bildireler — onıñ abartılılığı ve açıq yalancılığı mektep talebelerinde yorğunlıq, nefret ve red doğura. Talebeler etrafta olğanlarnı yahşı añlaylar, ve er vaqıt açıqtan-açıq narazılıq bildireler: ukrayin bayraqlarını boyamız, gimnimizni yırlaymız, ukrayin tilinde laf etemiz. İşğalci memuriyetler nasıl areket eteceklerini bilmeyler. Basqını eksiltmek yerine, olar "arbiy—vatanperverlik" tedbirleriniñ sayısını arttıralar —ve bu vaziyetni daa beter ete", — dep haberde aytıla.
Hatırlatamız, "Suspilne Qırım" ukrayin pozitsiyası sebebinden taqip etilgen ve evini coyğan Qırım sakini Oleksandra Ğalkinanıñ ikâyesini tarif ete edi.
Oleksandra Yaltadaki mektepni 2012 senesi bitirdi. Bir qaç yıldan berli çetelde yaşay, balalar içün ingliz tili ocası olıp çalışa. Ondan da ğayrı, Qırım aqqında videolar çıqarmaqta. Olardan biri, mektep aqqında: işğalden evel ve soñuna qıyaslama, onı içtimaiy ağlarda aman-aman yarım million qullanıcı baqtı.
"Bu fotoresimlerni körgende, bu balalarnı arbiy urbada körmek pek ağır oldı. Olar Rusiye FVN-niñ formalarında, amma olar kadetlerdir. Bu formalarnı öz parasına alalar. Yani ana-babalar balalarğa ala. Ve mektep yerine bu propaganda şeylerinen oğraşalar. Bunı körgenimde, pek kederli ve yaralı oldım. Mektepte olğanımnı hatırlap, böyle bir şey yoq edi", — Oleksandra dey.
Ukrayina prezidentiniñ Qırımdaki temsilciligi bildirgenine köre, işğalciler yarımadada "Avangard" mahsus merkezini qurmağa planlaştıralar, mında, hususan, balalar içün arbiy toplaşuvlar keçirilecek. Böyle bir arbiy—vatanperverlik terbiyesi merkezi Moskvada çalışa.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
