Qırımnıñ işğalci akimiyeti muqavelerge alınmaq içün yaş sıñırını kötermekte ve sağlıq şartlarını eksiltmekte.
Azatlıq Radiosınıñ "Qırım.Kerçekler" leyhası Qırım uquq qoruyıcısına esaslanıp bu aqqında bildire.
"Qanunnamelerniñ sayısını arttırmaq içün eñ semereli yol — yaş aralığınıñ kenişletilmesidir. Hatırlağanımız kibi, başta sözde "MAA"nı muqavele hızmetine 45 yaşına qadar aldılar. Soñ bu sıñırnı 60 yılğa qadar arttırdılar. Ve şimdi onı 64 yaşına qadar alıp kettiler. Rusiye Mudafaa nazirliginde bu adımnıñ qanuniyligi aqqında sorasam, şimdi bu regionlarnıñ qararına berilgenini ayttılar: bazı Rusiye subyektleri "MAA" zonasında muqaveleciler içün yaş sıñırını 65-ke qadar köterdi", — uquq qoruyıcı dedi.
Uquq qoruyıcılarnıñ malümatına köre, Rusiye arbiy komissarları, kelecekte askerlikke alınğanlarnıñ hronik hastalıqları olğanına emiyet bermey.
"Şimdilik arbiy ekimlerniñ komissiyaları, muqavele esnasında iştirak etkenlerniñ beden sıfatına baqmay, sağlıq köstergiçlerine baqalar. Er kes añlay ki, ücüm etkenlerniñ ömür müddeti qısqa ola, şunıñ içün hronik hastalıqlar bu kibi muqavele esnasında kritik alğa yetip olamay. Arbiy bölüklerden birinde olğan menba aytqanı kibi, askerniñ frontnıñ faal qısmında on künlik vazifelerini eda etmek içün küçü yetmeli — bu endi onıñ ile añlaşma tizilmesi içün yeterlidir", — dep uquq qoruyıcı qayd etti.
Hatırlatamız, Qırım uquq qoruyıcı gruppasınıñ reberi Olğa Skrıpnık, Suspilne Qırım bergen izaatında, mobilizatsiya kampaniyaları Qırım ealisini nezaret etüvniñ esas yönelişlerinden biri olıp qala, dep ayttı — gençler müddetke köre çağırıla, büyük erkekler ise 2022 senesiniñ sentâbrinden başlap "qısmen mobilizatsiyağa" alına.
İlk tahminlerge köre, kampaniya vaqtında beş biñge qadar adam celp etildi. Şimdilik Qırımdaki esli—başlı ealiniñ mobilizatsiyası eksildi — Rusiye Herson, Donetsk, Luğansk kibi diger işğal etilgen topraqlarda daa kütleviy mobilizatsiyalarnı tercih ete.
"Qırım Kreml içün siyasiy mesele kibi körüne — Putin yarımadada er şey tınç olğanını köstermege tırışa, — dep Skrıpnık añlata. — Şunıñ içün faal kütleviy çağıruvlar sıñırlı, mobilizatsiya resursları ise soñki nevbette qullanıla".
Diger bir yöneliş, uquq qoruyıcılarnıñ tahminlerine köre, eñ çoq zarar körgen yerler — muqavele hızmetleridir. İlk sefer askerlikke alınğanlarnıñ bir qısmını, kontrat tizmege mecbur eteler. Böyleliknen Rusiye cenkte resmiy olaraq "gönüllü" iştirak etkenini köstere. Olğa Skrıpnıknıñ aytqanına köre, böyleliknen añlaşmanı göñülli imzalağanlar ve mecburen askerlikke alınğanlarnı ayırmaq qıyın ola.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
