33 yaşındaki qırımtatarı İlnur Şağayevni qural aynıñ 20-nde halqara "İnterpol" politsiyası Frenkistanda RF FSBsiniñ talabınen yaqaladı. O, qorantasınen beraber Qırımdan tam bir cenk başlanmazdan evel ketti ve İrlandiyada muvaqqat qoruv aldı. Qanunsız tutuluv, Büyük Britaniyağa paromğa çıqqan vaqıtta oldı. Uzun bir mahkeme esnasından soñ, Frenkistannıñ Yuqarı istinaf mahkemesiniñ qararı ile onı azat ettiler.
Qırımtatar Milliy Meclisiniñ reisi Refat Çubarov Facebookta bu aqqında bildirdi.
İlnur Şağayevni frenk uquq qoruyıcıları ekim ayınıñ 22-nde apishaneden çıqardılar ve sürgünlik merkezine avuştırdılar. Boş aynıñ 7-nde o, Frenkistan territoriyasını terk etip, artıq İrlandiyağa keldi, mında onı qorantası bekley edi — qadını ve üç çağına yetmegen balası.
"Bu davanıñ ketişatını közetkenler, İlnur Şağayevniñ tutulmasına sebep, Rusiye Federatsiyası organlarınıñ İnterpolğa standart, belli qabaatlav ile muracaat etmesi oldı, Rusiye mahsus hızmetleri qırımtatarlarğa "terrorizm" qabaatlavı ile qabaatlay. Şunı qayd etmek kerek ki, Rusiye tarafınıñ İlnur Şağayevge qarşı bütün "delilleri" vaqtınca işğal etilgen Qırımda tutulğan şahıslardan alınğan şaatlıqlarğa esaslana edi", — dep Çubarov yazdı.
Refat Çubarovnıñ aytqanına köre, Qırımtatar Milliy Meclisi em Frenkistan tarafına — Ukrayinadaki Frenkistan Elçihanesi vastasınen, em de Ukrayina Tış işler nazirligine muracaat etti. Bütün baqışlardan soñ qırımtatarı frenk mahkeme sisteması tarafından aqlandı, uquq qoruyıcılarnıñ areketlerinde ise bozuvlar tapıldı.
"Mahkemede İlnur Şağayevniñ bütünley aqlanuvı ile yekünlendi. Frenkistan Yuqarı istinaf mahkemesi, Frenkistan uquq qoruyıcı organlarınıñ İlnur Şağevge nisbeten areketleri ayrı, amma müim aspektlerde milliy qanunlarnıñ şimdiki qaidelerini bozğanını tanıdı", — dep Çubarov qoştı.
Hatırlatamız, Suspilne Qırım, Rusiye Interpol mehanizmini satqın vatandaşlarnı, hususan qırımtatarlarnı, yaqalamaq içün nasıl qullanğanını tarif etken edi.
"İnterpol nizamnamesiniñ üçünci maddesi bar — siyasiy meselelerge qarışmaq yasağı. Yani, siyasiy manası olğan bütün davalar baqılmamalı. 2014 senesi Qırım işğal etilgen soñ Ukrayina Baş kâtibiyetke işğal etilgen territoriyadan kelgen bütün muracaatlar qabul etilmemek kerek olğanını resmiy şekilde bildirdi", — dep advokat Mıkola Polozov añlattı.
Amma Rusiye quvetçileri bu yasaqnı tez bir zamanda bozmağa ögrendi, dep qoşa advokat. Onıñ aytqanına köre, olar cinaiy davalarnıñ asılını gizlep, vesiqalarda "Qırım Cumhuriyeti, Rusiye Federatsiyası" degil de, "Rusiye" ya da tek şeerniñ adını qayd ete ediler.
Vaziyet tam bir istilâdan soñ deñişti. 2022 senesi İnterpol Rusiyeniñ malümat bazalarına doğrudan irişimini sıñırladı ve istilâcı memleketlerniñ bütün muracaatlarını baş kâtibi vastasınen teşkermege mecbur etti. Amma, Polozovnıñ qayd etkenine köre, Rusiye Federatsiyası teşkilât azası olıp qala.
QRM yolbaşçısı Eskender Bariyevniñ aytqanına köre, 2022 senesi ATR telekanalınıñ qırımtatar jurnalisti Gülsum Halilovağa oşağan tevqif etildi — onı İstanbul ava limanında Rusiye Federatsiyasınıñ talabınen tuttılar ve ukrayin ve türk diplomatları kirişmegence, aman-aman 17 saat tuttılar.
"Rusiye uquq qoruyıcıları cinaiy taqip aqqında belli bir maqsatnen haber etmey — insanlarnı, malümatları olmağanları içün, seyaat etkende yaqalap, soñra Rusiyege ekstraditsiya ete bileler", — Bariyev dey.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
