Rostov-na-Donudaki Cenübiy okrugınıñ arbiy mahkemesi Ukrayina vatandaşını 10 yıl sert rejimli koloniyada qalmasına üküm etti. Onı "Rusiye arbiyleriniñ ve Zaporizhzhâ vilâyetiniñ yolbaşçısınıñ maşinasını patlatmağa tırışqanında" qabaatlaylar.
RİA "Novosti Qırım" bu aqqında bildire. O, Rusiye kontrolindeki Qırım ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) FSB idaresine atıf ete.
Rusiye uquq qoruyıcılarınıñ malümatına köre, adam işğal etilgen Sevastopolda (Aqyarda) bulunıp, "USQniñ MOQden öz başına yapılğan patlayıcı aletlernen saqlanğan yerniñ koordinatlarını aldı". O, "Rusiye arbiyleri ve Zaporizhzhâ vilâyetiniñ yolbaşçısınıñ maşinasını patlatmağa planlaştıra edi".
Sevastopolda (Aqyarda) FSB hadimleri tarafından tutuldı. Erkekke qarşı "patlayıcı maddelerniñ qanunsız saqlanuvı" ve "terroristik areketlerniñ azırlanuvı" boyunca cinaiy işler açıldı.
Rostov-na-Donudaki Cenübiy okrugınıñ arbiy mahkemesi onı qabaatlı tanıp, 10 yıl sert rejimli koloniyada qalmasına ve 300 biñ ruble para cezasını almasına üküm etti. Apellâtsion mahkemeler ükümni deñiştirmedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
