İşğalciler Qırım mektep talebelerini, tasilde rusiye özdeşligini şekillendrmege yönelgen "Men — rusım" bala teşviqat aktsiyasına celp eteler. Vaqtınca işğal etilgen yarımadadan 2781 iştirakçi qayd etildi.
İşğalli Qırım Cemaat palatası bunı bildirdi.
Rusiye kontrolindeki organnıñ mesleatçısı Yevgeniy Kostılövniñ aytqanına köre, yarımada iştirakçilerniñ sayısına köre beş liderden biri ola.
"Aktsiya Halq birligi kününe (boş aynıñ 4-ne) bağışlana. Onıñ maqsadı — mektep talebeleriniñ umumiy medeniyetiniñ inkişafı, umumiyrusiye vatandaşlıq kimliginiñ şekillenmesi, Vatanğa sevgi ve Rusiyeniñ farqlı halqlarınıñ temsilcilerine ürmetni terbiye etmektir", — dep Yevgeniy Kostılöv tarif etti.
Hatırlatamız ki, bundan evel Suspilne Qırım bildirdi ki, işğal etilgen Qırımda, Herson ve Zaporijjâ vilâyetlerinde balalarnı "vatanperver terbiyesi"nen meraqlandırmağa başladılar.
"Geniçeskte faaliyetçiler bildirdiler ki, Rosgvardiya arbiy hızmetçileri farqlı yaştaki talebeler içün "taktik tibbiyet" dersleri keçireler — balalar yaralanğanlarnı tahliye etmege, qan tökülmesini toqtatmağa ve "ekstremal şaraitte" areket etmege ögreneler, Ukrayina olarnıñ şeerini daima "terrorğa oğratqanı" içün er vaqıt azır olmaq kerek, dep aytalar, em de balalar içün "Rusiye canı" kibi yarışlar keçireler'', — dep QRM bildirdi.
QRMniñ malümatına köre, yerli kolleclerde "Rusiye medeniy mirası" mevzusında viktorinalar keçirile. İşğalli akimiyet "modeli kitaphaneler" ve "gençlik merkezleri"ni faal sürette meydanğa ketire.
"Aynı zamanda, mektep talebeleri ve studentler "Men vatandaşım" kibi leyhalarğa celp etile, mında gençler "Vatanğa hızmet etmege" ve "Yunarmiya"da iştirak etmege teşviq etile. Bu areketni "ayat mektebi" dep adlandıralar, onıñ iştirakçilerini arbiy hızmetke azırlaylar. Böyleliknen, işğalciler ukrayin kimligini yoq etmege ve studentlerge rus dünyasınıñ qıymetlerini aşılamağa tırışalar", — dep merkez qoştı.
QRMniñ qayd etkenine köre, tasil ve medeniyet alanınıñ askeriyleştirüvi Rusiyede 12 yıldan berli devam etken sistematik bir ameliyattır.
"Vaqtınca işğal etilgen Qırımda mektepni bitirgen, universitetlerge kirgen ve bütün ömürlerini Rusiye teşviqatı tesirinde keçirgen balalarnıñ episi östi. Bundan da ğayrı, işğalli akimiyet mektep ve kitaphanelerge yardım ete, "reformalar" ve "oquv şaraitiniñ eyileştirilmesi" aqqında ilân ete. Bu adımlar gumanitar degil de, teşviqat maqsadınen yapıldı — ukrayin kimligini yoq etmek, ukrayin tili ve medeniyetini yoq etmek ve balalarğa rus qıymetlerini aşılamaq", — dep merkez yekünledi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
