İşğal etilgen Qırımda bir afta içinde Rusiye uquq qorçalayıcıları içtimaiy ağlarda "Rusiye ordusın itibardan tüşürgen" tefsirler içün üç insannı tuttılar. Olardan birisine endi 40 biñ rublelik (tahminen 13 biñ ğrıvnâ — muar.) para cezası berdiler.
Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
Qırımda içtimaiy ağlarda "Rusiye arbiy hızmetçileri aqqında menfiy tefsirler"de qabaatlanğan 3 insan tutuldı.
Olarnıñ davaları "mahkeme"ge yollanıldı, olardan birine qanunsız şekilde 40 biñ rublelik (tahminen 13 biñ ğrıvnâlıq — muar.) para cezası berildi.
Bundan ğayrı, işğalciler yerli sakin İgor Poçığayloğa Qurman rayonınıñ Büyük Onlar köyündeki tükânda ukrayin muzıkasını diñlegeni sebebinden 30 biñ rublelik (tahminen 10 biñ ğrıvnâlıq — muar.) para cezasını berdi.
"Yarımadada qanunsız memuriy basqı keñiş qullanıla. 2025 senesi orta küz ayınıñ 20-ne qadar Rusiye Federatsiyasınıñ Memuriy uquq bozuvları qanunnamesiniñ 20.3.3 maddesine istinaden eñ azdan 1602 taqip adisesi qayd etilgen edi (RF ordusını itibardan tüşürgen açıq areketler: 1486 dava boyunca ceza qararları çıqarıldı ya da olarnı başqaları ile birleştirdiler, daa 24 dava baqılmaqta", — dep temsilcilik bildirdi.
Bir ay evelsi, 2025 senesi ilk küz ayınıñ 15-nde, işğal etilgen Qırımda "Rusiye ordusınıñ itibarını tüşürüv" maddesi boyunca 1554 dava qayd etildi. Arman ayınıñ 25-ne qadar 1536 qanunsız yürüş aqqında haber bar edi.
"Böyle davalarnıñ çoqusı Ermeni Bazarda qayd etildi, o, hususan, Rusiye tarafından işğal etilgen Ukrayinanıñ diger topraqlarınıñ sakinleri içün qullanıla — tek 2025 senesiniñ üç çeriginde anda 238 dava açıldı, bu yarımadada olğanlarnıñ yarısından ziyadesi", — dep müessise bildirdi.
"Rusiye ordusını itibardan tüşürüv" memuriy maddesine binaen, fizikiy şahıslar içün 30-dan 50 biñ rublege qadar cöreme, müessise reberleri içün — 100 biñ rublege qadar cöreme ve uquqiy şahıslar içün — 300 biñ rublege qadar cöreme belgilene. Tekrar mahküm etilse, cinaiy dava açıla bile.
Ukrayina prezidentiniñ Qırım Muhtar Cumhuriyetindeki temsilciliginiñ bildirgenine köre, işğal uquq qorçalayıcıları "Rusiye ordusını itibardan tüşürüv"de qabaatlanğan 23 davanı baqmaqta. Bu Rusiye Federatsiyasınıñ Memuriy uquq bozuvları qanunnamesiniñ 20.3.3 maddesidir. 2025 senesi orta küz ayınıñ 13-nde 1585 "dava" qayd etildi, olardan 52%-i qadınlarğa qarşı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
