İşğalli Qırım uquq qorçalayıcıları "RF ordusını itibardan tüşürüv"de qabaatlanğan 23 dava baqmaqta. Laf, Rusiye Federatsiyasınıñ Memuriy uquq bozuvları qanunnamesiniñ 20.3.3-nci maddesi aqqında kete. 2025 senesi orta küz ayınıñ 13-ne qadar, yuqarıda añılğan qabaatlav boyunca 1585 "dava" qayd etildi, olardan 52%-i qadınlarğa qarşı.
Ukrayina prezidentiniñ Qırım Muhtar Cumhuriyetindeki temsilciligi bunı bildirdi.
"2025 senesi orta küz ayınıñ 13-ne qadar vaqtınca işğal etilgen Qırımda "Rusiye Federatsiyası Silâlı quvetlerini itibardan tüşürüv" aqqında Rusiye Federatsiyası Ceza qanunnamesiniñ 20.3.3 maddesine istinaden 1585 dava qayd etildi", — dep haberde bildirildi.
Prezidentniñ temsilciligi şunı talil etti — 1449 davasında para cezaları ya da davalarnı birleştirüv qararları çıqarıldı. 23 davanıñ baqılması devam ete. Rezolütsiyalarnıñ 52%-i (755) qadınlarnen bağlı, 48%-i (691) ise erkeklernen bağlı.
Bundan evel Suspilne Qırımnıñ bildirgenine köre, işğalcilerniñ "RF ordusını itibardan tüşürgenleri" içün qabaatlavlar eñ çoq Herson vilâyetiniñ memuriy sıñırında yerleşken işğal etilgen Ermeni Bazar şeerinde qayd etile. Ukrayina prezidentiniñ Qırım Muhtar Cumhuriyetindeki daimiy temsilcisiniñ muavini Denıs Çıstikovnıñ aytqanına köre, buña memuriy sıñırdan keçken vatandaşlarnıñ filtratsiya teşkerüvinden keçüvi tesir ete.
"Olarnı kök astında tutalar — küneşte ya da açıq ava şaraitinde. Telefon ve diger cihazlarnı, ceza içün qullanıla bilgen er angi malümatnı qıdıralar. İlk evelâ — memuriy", — dep Çıstikov tarif etti.
Bölge insan aqları merkeziniñ adliyecisi Volodımır Vyazovtsevniñ qayd etkenine köre, memuriy protokolnı tizmekniñ sebebi er angi Ukrayina tarafdarı nazar noqtası ola bile.
"Esasen bu ukrayin tilinde neşirler ya da atta sade tenqit. "Putinni sevmeyim" demek yeterli — ve bu endi "Rusiye Silâlı quvetlerini itibardan tüşürüv"dir. Keçit noqtasında protokol tizile ve mahkemege berile", — dep advokat añlattı.
Onıñ aytqanına köre, Ermeni Bazar tesadüfen bu kibi davalarnıñ sayısına köre lider olmadı.
"Ruslar şeerden arbiy tehnikasını ve hadimlerini keçirelar. Bu müim naqliyat noqtasıdır, şunıñ içün işğalciler yerli sakinler arasında er angi ukrayin keyflerini bastırmaq kerekler", — dep Vyazovtsev añlattı.
Advokat, mantıqsız qabaatlavlarnıñ misallerini de ketirdi.
"Bir vaqıtları şirketniñ cıyınında Verka Serdüçkanıñ yırlarını çala ediler. Birisi şikâyet etti, şaatlar celp etildi — şirket 300 biñ rublege (150 biñ ğrıvnâ) para cezasını aldı", — dep tarif etti o.
Memuriy maddege binaen, "RF ordusını itibardan tüşürgen" şahıslar içün 30 biñden 50 biñ rublege (15-25 biñ ğrıvnâ) qadar para cezası, müessiselerniñ reberleri içün 100 biñ rublege (50 biñ ğrıvnâ) qadar para cezası ve uquqiy şahıslar içün 300 biñ rublege (150 biñ ğrıvnâ) qadar para cezası belgilene. Tekrar mahküm etilse, cinaiy dava açıla bile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
