UHH, "Qırım naziriniñ muavini"nen bağlı mahkemeden evel tahqiqatnıñ tamamlanğanını bildirdi. Tahqiqatnıñ malümatına köre, o, 2024 senesiniñ başında işğalli memuriyetnen işbirlik yapmağa razı oldı ve grajdan obyektleriniñ sökülmesini teşkil etti, elde etilgen qurucılıq malzemelerini ise, Rusiye ordusınıñ qalelerini qurmaq içün cenk areketleri alanına yollay.
UHHniñ Qırım Muhtar Cumhuriyetindeki Baş idaresiniñ Facebook saifesinde bu aqqında haber etildi.
UHHniñ malümatına köre, Qırımdaki şübelengen adam 2024 senesiniñ başından berli "mesken siyaseti naziriniñ muavini" vazifesinde buluna.
Açıq menbalarnıñ malümatına köre, söz Ukrayina vatandaşı Yevğeniy Agureyev aqqında kete. 2025 senesi sentâbr ayında o, "Novosti Krıma" RİAğa bergen izaatında, onıñ nezaretindeki işğalli müessise Rusiye Mudafaa nazirliginen işbirlikte bulunğanını ve Qırımdaki qurucılıq malzemelerini cebege bergenini iddia etken edi.
"Bazı obyektlerde ğayrıdan qullanıla bilgen qurucılıq malzemeleri qaldı. Mudafaa nazirliginen körüştik, çünki qurucılıq malzemeleri cebede kerek", — dep işğalli memur ayttı.
Oña Ukraina Ceza qanunnamesiniñ 111-1-nci (duşmannen işdeşlik faaliyet) maddeleriniñ 5-inci qısmına istinaden qabaatlav aqqında bildireler ve 10 yılğa qadar azatlıqtan marum etüv ve mal-mülkniñ musadere etilmesi cezası berile bile. Cinaiy dava malümatları mahkemege yollanıldı.
"O, yarımadada qurulmağan vatandaş obyektleriniñ söküvi ve alınğan qurucılıq malzemeleriniñ cenk alanına ketirilmesi leyhasını idare ete. Bu resurslarnı rusiyeliler, cebedeki mudafaa noqtalarını quvetleştirmek içün qullanalar. Bundan ğayrı, o, işğalcilerge açıq qol tutqan teşviqat kütleviy haber vastalarında faal iştirak ete", — dep Ukrayina mahsus hızmeti bildirdi.
Hatırlatamız ki, işğal etilgen Qırımda bitirilmegen qurucılıqlarnı bozıp başladılar, qurucılıq malzemeleri ise Rusiye arbiy hızmetçileri tarafından cenk areketleri alanına yollanıla. İşğalcilerniñ malümatına köre, yarımadada daa dört biñden ziyade obyekt qayd etildi. Em de Qırımdaki mülk saipleri öz mülklerini yoq etilüvden saqlamaq istegen olsalar, Rusiye bücetine arttırılğan bergi tölemege mecbur olacaqlar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
