Apiske alınğan qırımtatarlar, "Hizb ut-Tahrir" "Birinci Canköy gruppasınıñ" davasınıñ iştirakçileri makemede soñki sözüni aytmağa azırlanalar. Toplaşuv boş ayınıñ 25-ne planlaştırılğan.
"Qırım birdemligi" advokat Emil Kurbedinovnıñ malümatına esaslanıp bu aqqında bildire.
"Bundan evel prokuror Enver Kroş içün 17 yıl sert rejimli koloniyada qalmasını talap etken edi, Edem Bekirov ve Rinat Aliyev içün — er biri 15 yıl, jurnalist Vilen Temeryanov içün — 13 yıl, Seyityağa Abbozov içün — 11 yıl. Birinci dört yılnı olar apishanede keçirecekler", — dep haberde aytıla.
Kurbedinovnıñ aytqanına köre, quvetçlerniñ qırımtatarlarnı "apiske alması içün iç bir qanuniy sebebi yoq edi" ve erkeklerniñ terrorizmnen iç bir alâqası yoq edi.
"2006 senesinden berli Rusiyede "Terrorizmge qarşı küreş qanunı" bar, o, terrorizm añlamını belgiley, terroristik teşkilât ne olğanını ve onı nasıl tanığanını añlata. Olarnıñ areketleri ve yaşayış tarzı bu qanunğa uymalar. Bu, imaye içün esas delil edi", — dep Kurbedinov qayd etti.
Advokat qayd etti ki, makeme taqiqatı devamında bir sıra bozuvlar qayd etildi — "gizli şaatlarnıñ" sorğusı, delillerniñ taqdim etilmesi, em de malümat sahteligi. Onıñ aytqanına köre, dava iştirakçileriniñ er birinde olarğa ait olmağan edebiyat "tapıldı".
"Hizb ut-Tahir davası"nıñ birinci Canköy gruppası aqqında ne bilemiz
2022 senesi arman ayında Qırımnıñ Canköy rayonındaki evler kütleviy şekilde tintilgen soñ altı qırımtatar adamı tutuldı: Enver Kroş, Vilen Temeryanov, Rinat Aliev, Murat Mustafaev, Seityağa Abbozov ve Edem Bekirov.
Olarnı Hizb ut-Tahrir islâm siyasiy firqasında iştirak etmekte qabaatladılar. Esas "delil" — 2015 senesi camide keçirilgen subetniñ audio yazısıdır. Advokat Emil Kurbedinovnıñ fikirince, onı sekiz seneden soñ FSB arhivlerinden çıqardılar, yani bu seneler devamında qayd etilgen qırımtatarlar cinaiy taqipke oğratılmadı ve "cemiyet içün iç bir telüke teşkil etmediler".
İmayeci, FSB hadimleri Canköylı qırımtatarlarnıñ davasını Ukrainadaki adise-vaqialarnen añlı tarzda "bağlağanını" qayd ete.
"Siyasetçiler, kütleviy haber vastaları ve mahsus hızmetler Ukrainadan idare etilgen "terror merkezi" yoq etilgenini bildirdiler. Bu endi, 2022 senesi kiçik aydan soñ olğan vaqialarnen bağlı ve zamanğa uyğun bir ikâyedir", — dep Kurbedinov "Qırım birdemligi"ne ayttı.
Makeme tahqiqatı vaqtında advokat ve dava iştirakçilerine makeme araştırmasına yollanğan malümatnen tanış olmaq imkânı berilmedi. Bundan da ğayrı, bu vaqıt "terror areketleri" ya da başqa "işkence areketleri" planlaştırılmadı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
