"Ateş" arbiy-partizan areketi işğal etilgen Qırımda bağ bozulğanını bildire. Dört kündir yarımadada ardı-sıra internet yaramay çalışa.
Areket Telegramda bunı bildirdi.
"Dört kündir sakinlerniñ İnternet ağı yaramay çalışa. Rusiyeniñ "MAX" messenceri çoqusında daima toqtalıp tura: telefonlar keçmey, programma "uçıp kete". Diger messencerlerde "Alaqası beklenile" statusı peyda ola. İşğalcilerniñ beceriksizligi net ve logistikağa bağlı olğan iş, ticaret ve biznes esnaslarını toqtata. Rejim, vatandaşlarğa qarşı eki kere ücüm ete", — dep haberde qayd etildi.
Hatırlatamız ki, arman ayında yarımadanıñ işğalli "içki siyaset, malümat ve bağ nazirligi" Qırımdaki mobil internetni uzun müddetke bütünley söndüre bilecegini bildirdi. Bu arada, internet provayderleri çalışmağa devam etecek.
Ukrayina tış istihbarat hızmetiniñ malümatına köre, tek 2025 senesi oraq ayında Rusiyede rekord 2099 internet kesilüvi qayd etildi, olarnıñ çoqusı işğal etilgen Qırımda oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
