Bir vaqıtları olar halqara sport yarışlarında Ukrayina bayrağını kötergen ediler. Bugün ise — Rusiyeniñ üç renkli bayrağınen poza eteler. Artur Ayvazân, Vira Rebrık, Emin Seferşayev — olar Ukrayinanı temsil etip, medaller qazanğan Qırım sportçularınıñ adlarıdır. 2014 senesinden soñ pasportları ve lafları deñişti. Ukrayinağa hainlik yapqan sportçular aqqında Suspilne Qırım haber ete.
Oqçu Artur Ayvazân Qırım işğal etilgen soñ Rusiyege qoltuttı
2008 senesi oqçu Artur Ayvazân Pekin Olimpiadasından altınnen qayttı. Ğalebeni ukrayin sportçusı olaraq qazandı. İşğalden soñ Ayvazân Rusiye tarafını tuttı ve Rusiye kütleviy haber vastalarına bergen intervyusında Ukrayinanı tenqit etti.
"Ukrayina, Qırım sportçııarınıñ Ukrayinada yetişken sportçular olğanlarını tüşüne. Amma men, Ermenistanda doğıp öskenim içün, Ukrayinağa halqara seviyede sport ustası olaraq keldim. Rusiyede sportqa munasebet bam-başqa seviyede", — dep Ayvazân ayttı.
Ayvazân içün bu "başqa seviye" aynı 2016 senesi bitti — Rusiye Rio de Janeyro Olimpiadasına yiberilmedi. Üç renk altında büyük sport ğalebelerini endi elde etmedi. Ukrayina Milliy Olimpik Eyyeti añlata: bu, Rusiye işğalinden soñ Moskvağa işanğan bir çoq Qırım sportçusınıñ tipik ikâyesidir. Şan-şeref yerine sıñırlavlar, sanktsiyalar ve halqara izolâtsiya aldılar.
"2014 senesinden 2022 senesine qadar olar özlerini Rusiye milliy taqımınıñ terkibinde tanıtmaq, halqara sanada çıqışta bulunmaq imkânına saip oldılar. Amma bu vaqıt içinde Qırım sportçularınıñ ciddiy bir muvafaqiyetini hatırlamayım. 2022 senesinden başlap, ruslarnıñ çoqusı sport türlerinde halqara yarışlardan marum qaldırdılar", — dep MOEniñ matbuat hızmeti yolbaşçısı Maksım Çeberâka bildirdi.
2014 senesi atlet Vira Rebrık Rusiye vatandaşlığını aldı
2014 senesi baarde Rusiye vatandaşlığını Qırım atleti Vira Rebrık da aldı. 2012 senesi Avropa çempionı bunı, işğal etilgen Qırımda qorantasını qaldırmağa istemegeninen añlattı.
"Men Yaltada doğdım, Qırımda yaşayım ve iç bir yerge köçmege niyetim yoq. Eger de biz ukrayin taqımı içün oynamağa qarar bersek, o vaqıt Qırımdan ketmek kerek olur edi", — dep Vira Rebrık ayttı.
O vaqıt Atletika federatsiyası bildirdi: sportçunı tutmaycaq, çünki o, Ukrayina içün oynamağa istemey. Rusiye Federatsiyası yarışmağa qarar bergen Rebrık ve daa altı sportçu içün tazminat ödedi. Rebrıknıñ üç renkli bayraqnen çıqışları beklenilgen muvafaqiyetni ketirmedi — 2014 senesinden berli o, tek Rusiye çempionatlarında iştirak etti. Qırımdaki Rusiye sport küreşi federatsiyasınıñ prezidentiniñ muavini İmran Üseinov añlata: 2014 senesi Rusiye tez ve muntazam areket etti. Yarımadanıñ sportçularını Rusiye bayrağı altında iştirak etmege teşviq etmek içün bütün şaraitni yarata ediler.
"Misal olaraq, Emin Srferşayev küreş stili boyunca Avropa kadet çempionatında Ukrayinanı temsil etti. 2014 senesi, Rusiye kelgen soñ, oña red etip olamağan bir teklif yapıldı. İşğal, qoranta, yollar ve ilâhre. Adam qıyınlıqlardan vazgeçip, Rusiyeni temsil etmege başladı", — dep "Qırım Cumhuriyeti sport küreşi federatsiyası" teşkilâtınıñ vitse-prezidenti İmran Üseinov tarif etti.
Keçken sene Parij olimpiyadasına tek 16 rusiye sportçusı — Qırımdan iç biri qatnadı. Olimpiyada eyyeti añlattı ki, olar episi bitaraf olaraq iştirak etti. Bundan evel er kes teşkerildi.
"Biz, Rusiye sportçularınıñ cenkke qoltutmaları aqqında delillerni topladıq — bu içtimaiy ağlardaki yazılar, like, bildirmeler ola bilir edi. Meselâ, sportçunıñ toplaşuv keçirmesi ya da Qırımda bulunması, Ukrayina sıñırını qanunsız olaraq keçmesi demektir. Biz. bu malümatnnı Halqara Olimpiya eyyetine beremiz, ve bu, yasaqnıñ sebeplerinden biri ola. Bunıñ içün Qırımda olar içün toplaşuv keçirmek telükelidir", — dep MOEniñ matbuat hızmeti yolbaşçısı Maksım Çeberâka bildirdi.
Keçmişte Qırım yalısında sportçularnıñ toplaşmaları içün pek çoq baza edi, halqara yarışlar keçirilgen edi. 2013 senesi Yalta civarında dağ sınıfında dağcılıq dünya çempionatı olıp keçti. O vaqıt Qırımğa 13 dünyadan iştirakçiler keldiler. 2014 senesinden soñ anda halqara yarışlar keçirilmedi — şimdi bu, "özleri" içün izolâtsiya etilgen yardımadadır. Meselâ, orta küz ayınıñ başına qanunsız teşkil etilgen "DNR" Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeerinde öz ilk idmanını keçirdi.
Qırım futbol assostiatsiyasınıñ vitse prezidenti Oleğ Komunâr şunı ayttı: Moskva yarımadadaki turnirler, sektsiyalar ve klublarğa çoq para masraf etmege devam ete — amma sport inkişaf ettirmek içün degil. Bu, teşviqatnıñ bir qısmıdır.
"Bu em boks, em küreş, em de "Yedinaya Rossiya" ya da "Goblin Aksönova" kibi turnirlerni teşkil etken sport türleri. Esasen, para bar, ve bunı teşviqat olaraq qullanalar. Birisiniñ üstüni tikmek kerek olsa, bunı balalıqtan yapmaq kerek. Ve siz medaller, Putinnen diplomlar ya da eki başlı qartal bergen olsañız, elbette ki, balada "bu, yahşı ve mükemmel Rusiye", — dep Oleğ Komunar, Qırım ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ futbol birliginiñ prezident muavini tüşüne.
İşğalden soñ Yana Kloçkova Qırımğa köçti
Qırım sportçularınıñ sport qazançları şimdi Rusiye çempionatlarında iştirak etmektir. Bazıları ise ğayıp oldı. Yana Kloçkova — dört kere Olimpiya yüzme çempionı. O, ukrayin sportçuları arasında eñ çoq Olimpiaya mukâfatınen rekordcı edi, Ukrayina Qaramanı unvanını aldı, amma tolu miqyaslı istilâdan soñ işğal etilgen Qırımğa köçti.
"Bizim "altın balığımız" Yana Kloçkova, dört kere Olimpiya çempionı. O, Sidney ve Afina oyunlarında ğalebe qazanğan edi, amma cenk başlanğan soñ cemaat meydanından ğayıp oldı. Öz saifelerini açmay, Qırımda yaşay. Ukrayinler içün bu hainlik kibi körüne — cenk, Rusiye istilâsı aqqında bir şey aytmadı", — dep Maksım Çeberâka, MOEniñ matbuat hızmetçisi tarif etti.
Olimpiya Eyyetiniñ aytqanına köre, er bir sportçunıñ muvafaqiyetiniñ ölçegi halqara yarışlarda iştirak etmesidir. Olimpiya ya da dünya çempionatını qaçırsalar, qazanmaq imkânları ğayıp olur. Ve bu, Rusiye pasportlarını saylağan hain sportçularınıñ vaziyetidir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
