İşğal etilgen Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) Cenübiy körfezinde "Sevmorzavod"da yapılğan işler vaqtında yaldayıcı kranağır yüklerni kötermek içün yapılğan kranlı gemi yıqıldı. İşğalciler 15 insannı qurtarğanını bildirdiler, olardan 7-si yengil ve orta ağır yaralanıp hastahanege alındı.
İşğalli Sevastopol (Aqyar) "başı" Aksönov Telegramda bunı bildirdi.
UPD // İşğalli "Qırım taqiqat eyyeti"niñ malümatına köre, eki insan elâk oldı.
Deñiz naqliyatı telükesizligi ve qullanuvı qaideleriniñ bozulğanı sebebinden yaldayıcı kran yıqıldı ve eki insan elâk oldı, cinaiy dava açıldı (RF Ceza qanunnamesiniñ 263-ünci maddesiniñ 3-ünci qısmı), dep işğalli uquq qoruyıcılar bildirdiler.
"İki insan elâk oldı, 20-den ziyade yaralandı, olarğa kerekli tibbiy yardım kösterile", — dep "Sledkom Krıma" Telegramda haber berdi..
İşğalcilerniñ malümatına köre, 15 insan qurtarıldı, olardan 7-si yengil ve orta ağır yaralarnen hastahanege alındı. Yaralanğanlarnı şeer hastahanelerine alıp keteler.
"Bugün Cenübiy körfezde "Sevastopol deñiz zavodı"nıñ toprağında yaldayıcı kran üzerinde işler keçirilgende, fevqulâde vaziyet olğanı sebebinden kran yıqıldı. Vaqia yerinde fevqulâde vaziyetler ve qurtaruv hızmetleri çalışa, olar zavod hadimleri ve muqayt teşkilâtlarnıñ temsilcilerinen beraber olıp keçken adise aqibetlerini yoq eteler", — dep Aksönov yazdı.
Daa evel "Qırım yeli" monitoring Telegram kanalınıñ bildirgenine köre, adise saat 15:30-15:45 arasında yük avuştırılğanda vaqtında oldı. Gemide adamlar bar edi, bazıları deñizge tüşti.
"Büyük ihtimalnen, bu, qurulmağan ağır PK-700 "Grigoriy Prosânkin" yaldayıcı kranıdır. İşğalciler onı parçalay ve Rusiyege ketirmek içün Severodvinskke çıqarmağa planlaştıra ediler", — dep "Qırım yeli"niñ menbaları bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
