İşğal etilgen Qırımnıñ bir çoq şeerinde 2025 senesi qızdıruv mevsiminiñ başlanması bozula. Hususan, şikâyetler Simferopoldan (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adten) kele, anda işğalli akimiyet orta küz ayınıñ 20-nde evlerge sıcaq bermege vade etti.
"Qırım.Aqiqat" Qırım faalcilerinden birine atfı etip bunı bildirdi. Onıñ aytqanına köre, içtimaiy ağlarnıñ Qırım segmentinde sakinler çoq qatlı evlerde sıcaq olmağanından şikâyet eteler.
"Şimdi Simferopolda (orta küz ayınıñ 26-nda — muar.) çoq qatlı evler ve atta bütün soqaqlar qızdıruvsız qalğanı sebebinden narazılıqlar çoq — Suhodolna, Troleybusna soqaqları. Şeerniñ er yerinde, qızdıruv borularından suv çıqqa. Tamir hızmetleri qazalarnı çezmege yetiştirmey. Sebebi yalıñız qızdıruv mevsimine azırlıqnıñ zayıf olmasında degil, ilk evelâ, Simferopolnıñ (Aqmescitniñ — terciman) kütleviy noqta qurucılığı şaraitinde yañı binalar qoşulğanda yükke dayanmağan qızdıruv ağlarınıñ fizikiy aşınmasında", — dep faalci tarif etti.
Qızdıruv mevsiminiñ bozulması aqqında Rusiye tarafdarı olğan siyasetçi ve bloger Stepan Kiskin de bildirdi. Meskenlerde sıcaq olmağanına şikâyetlerni Rusiyege qoltutqan "JKH Kontrol RK" cemaat teşkilâtı da bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
