Rusiye ükümeti işğal etilgen Qırımnıñ cenübiy yalısında Yalta rayonındaki «Simeiz» şifahanesini Rusiye adlie nazirliginiñ “federal mülkiyetine” berdi.
Rusiye ükümetiniñ baş naziri Mihayil Mişustin imzası olğan emirinde qayd etile — ekim ayı 25-te Rusiye teşviqat devlet haber agentligi TASS bildirdi.
“Qırım Cumhuriyetiniñ «Klinik ihtisaslaştırılğan “Simeiz” şifahanesi” devlet bücet müessisesini federal mulkiyetke qabul etmek», — qayd vesiqada etile.
Rusiye adlie nazirligi, Rosmayno ve “Qırım Cumhuriyeti Nazirler Şurası” dört ay devamında “sanatoriyge berilgen mulkni federal mülkiyetke keçirmek içün tedbirler korülmesini temin etmeliler”.
Hatırlatmaq kerek ki, işğal etilgen Simeizde işğalciler Qara deñiz yalısında 6 qatlı mesken kompleksi qurmağa planlaştıralar. Qurucılıqqa ruhset işğalciler tarafından berildi, amma erli sakinler ve ekologlar qarşı çıqalar, çünki yañı bina Simeizniñ tarihiy korünişini boza ve kommunikatsiyalarnı ziyade yükley bile.
Qırımlılarnıñ muracaatlarından soñ, işğal istintaq komiteti bu vaqia boyünca qoşma protsedür teftişini keçirecegini bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
