Ukrayin medeniyetiniñ belli erbapları müzeyinde qırımtatar siyasiy mabüsleriniñ balalarına bağışlanğan "Olmağan balalıq" foto sergisi açıldı. Qırım işğaliniñ on birinci yılında 367 bala babasız qaldı, olardan 246-sı — çağına yetmegenler. Çoqusınıñ balalığı tintüv, mahkeme ve qorqunen keçti.
Suspilne Qırım jurnalisti serginiñ açılışını ziyaret etti.
Foto sergisi 2020 ve 2025 seneleri yapılğan eserlerden ibaret. Müellifler ve muarrirniñ adları havfsızlıq maqsadınen bildirilmey. Bu resimlerde balalar ösip, deñişeler, amma Rusiye apishanelerinden ana-babalarını bekleyler.
"Men bala olğanda, anamnıñ evden quvılğanını eşitkende, onı qorçalap, tezce büyümege istegenimni ayttım. Bugün bu balalar tekrarlanmamaq kerek olğan acılarnen yaşaylar. Bu barbarlar bizim ayatımıznı ve balalarımıznıñ ayatını hırsızlaylar. Olar bizni alıştırmağa isteyler, amma susmağa aqqımız yoq", — dep serginiñ açılışında Qırımtatar Milliy Meclisiniñ reisi Refat Çubarov tarif etti.
O, bugün repressiyalar sebebinden balalar nasıl etip tez büyügenini añlattı.
"Barbarlar bizim toprağımızğa keldiler, olarnıñ öz adı bar — "Rus dünyası". Ve bizim balalarımızğa, olarnıñ öldürgenleri er keske ne yapqanlarını añlamağanına qadar, bu barbarlar toqtamazlar. Bu balalar epimizden bunı toqtatmağa talap eteler. Epimiz ömrümizniñ kerçek manasına yetmek içün", — dep qoştı o.
Ukrayina Prezidentiniñ Qırım Muhtar Cumhuriyetindeki Daimiy Temsilciliginiñ reisiniñ muavini Denıs Çıstikov, 2017 senesi bu balalarnıñ çoqusınen körüşkenini hatırladı.
"O vaqıt balalar, olarnıñ çoqusı mektepten evelki yaşta edi, büyükler kibi körüne edi, çünki babası apiste bulunğan vaqıt anasına yardım etmek kerek olğanını añlay edi. Olar, silâlı insanlarnıñ ne içün kelgenlerini ve "teşkerüv" sözüniñ manasını bile ediler. Olarnıñ balalığı Rusiye Federatsiyası tarafından bozulğan edi, bunı cinayetten ğayrı başqa bir şey dep adlandırmaq mümkün degil", — dep qayd etti o.
ZMINA insan aqları merkeziniñ leyhalar idarecisi Viktoriya Nesterenko qayd etti ki, repressiyalar toqtatılmay.
"Siyasiy mabüslerniñ sayısı er kün arta, ve bunıñ neticesinde zarar körgen balalarnıñ sayısı arta. Anaları mahkemelerden başlap, er künlik yaşayış qıyınlıqlarına qadar er şeyni öz başına yapalar. Bu qorantalar yalıñız uquqiy degil de, ruhiy yardımğa da muhtaclar, çünki travma kelecek nesillerge keçe", — dep Nesterenko ayttı.
Siyasiy ve diniy baqışlar milliy azlıqlarnıñ musaviy aqları ve serbestlik aqlarınıñ nezareti departamentiniñ müdiri Olena Antonenkonıñ aytqanına köre, sergi — bu sadece bir bediiy leyha degil, bu bir delil vesiqasıdır.
"Bu, on yıldan ziyade devam etken işğalniñ cinayeti. Er bir resim — qorqu içinde yaşamağa mecbur olğan ve apishaneden ana-babasını beklegen balanıñ sesidir. Bizler unutmamalımız ki, bu statistikadaki er bir adnıñ arqasında — qırılğan taqdirler, amma aynı zamanda ukrayin ve qırımtatar qorantalarınıñ qırılmaz küçü bar", — dep qayd etti o.
Sergi Çehiya Cumhuriyeti Tış işleri nazirliginiñ maliye desteginen teşkil etildi. O, 2020 senesi ilk sefer vaqtınca işğal etilgen Qırımda qırımtatarlarnıñ taqip etilüvi aqqında ikâye etken Emine Cepparnıñ "Özüme sadıqlıq — cinayet degil" leyhasınıñ ğayesini devam ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
