"Qırım Latin ve Amerika KHVda Avropa KHVdan daa çoq qayd etile" — yañı tedqiqat

Kıyivde "Ukrayina ve Qırımnıñ Latin Amerika memleketleriniñ medialarında añıluvı" tedqiqatınıñ neticeleri taqdim etildi. 2024 senesi saban ayından 2025 senesi saban ayına qadar Latin Amerikasınıñ çeşit memleketlerinde (esasen ispan tilinde) online matbuatta 87,4 biñ neşirniñ talili yapıldı.

"Qırım Latin ve Amerika kütleviy haber vastalarında Avropa kütleviy haber vastalarından daa çoq qayd etile. Bu, kerçekten de, Ukrayinanıñ Stratkom ile ne olğanını açıq-aydın köstere, çünki Latin Amerikada, şimdi teşviqatnen oğraşqan taqımlar bar. Soñki eki buçuq yıl içinde Ukrayinadan Latin Amerika matbuat vastalarına aman-aman 70 sesni qoşmağa yetiştirdik", — dep "Resilient Ukraine" teşkilâtınıñ tesisçisi İnğa Vışnevska tarif etti.

Tedqiqatnıñ taqdimi vaqtında mütehassıslar Latin Amerika kütleviy haber vastalarınen işbirlik tecribesi aqqında tarif ettiler, hususan işğal etilgen Qırımda insan aqlarınıñ bozuluvını aydınlatmaq mevzusında.

"Qırımnıñ latin amerikalı seyirciler içün meraqlı mevzuları aqqında sorasaq, elbette, tarih, medeniyet, insan aqları mevzuları peyda ola. "Qadın muqavemeti" ğayesi de meraqlı edi. Bu şahsiyleştirilgen ikâyeler. Bizim toplaşuvlarımızda siyasiy mabüslerniñ tuvğanları da iştirak etmege tırışalar. Biz insanlarnıñ canlı ikâyelerinen, ayat tecrübelerinen bağlı ikâyelerinen qonuşamız. Böyle şahsiyleştirilgen ikâyeler sayesinde biz yalıñız qonuşmağa degil de, bundan soñ matbuatta bir maqale çıqara bilemiz, anda bir insannıñ, siyasiy mabüslerniñ ceetinden işğal etilgen Qırımda insan aqları vaziyeti aydınlatıla", — dep Qırım platformasınıñ faaliyetini temin etüv hızmetiniñ reberi Nelâ Ğrınışın ayttı.

Ukrayinadaki cenk meseleleriniñ aydınlatılmasında esas mevzu Rusiye teşviqatına qarşılıq köstermektir.

"Bizim içün añlaşılır ki, bu memleketlerde daa yahşı bilgilerni ve Ukrayinanıñ añlamını deñiştirmek kerekmiz. Çünki biz aqqında çoq vaqıt başqaları, Rusiye aytqan edi. Bu memleketlerde ruslar aqqında tarihiy, medeniy, siyasiy malümatlar az-çoq şekillendirilgen. Amma bizim aqqımızda fikirler daa az şekillendirilgen. Qırım bu mevzulardan biridir. Qırım mevzusını seslendirmek ne vaqıt müim olğanını añlamağa tırışamız. Çünki Qırım mevzusı — Ukrayinada çalışqan er bir mevzunıñ ayırılmaz parçasıdır", — dep Ukrayina institutınıñ baş müdiriniñ muavini Alim Aliyev añlattı.

Ukrayina Tış işleri nazirliginiñ hususiy vazifeler elçisi, Meksika Birleşken Devletlerinde, Gvatemala Cumhuriyetinde, Kosta-Rika Cumhuriyetinde, Panama Cumhuriyetinde ve Belizde (2012-2021 s.), Latin Amerika ve Karib körfezi meseleleri mahsus temsilcisi olğan Ruslan Spirin bu memleketlerde cemaat fikriniñ pek büyük emiyeti bar olğanını ayttı.

"Dünya bizni añlasın dep, bu yönelişniñ esaslarından biri olğanını añlamaq kerekmiz. Çünki elçihanede bunı aytmaq yeterli degil. Bu daa da müimdir, çünki siyasiy, ükümet beyanatlarınıñ nasıl qabul etilgenini añlaymız, hususan Latin Amerika memleketlerinde. Bilemiz ki, yañı bir ilim bar, yani krosmedeniyet, o, er bir milletniñ zihniyetini parçalay ve insanlarnıñ nasıl qabul etkenini añlay. Olar içün aydavcıñız ya da temizlik hadiminiñ aytqanları, televizior, Meclis azası ya da nazirniñ aytqanlarından daa müimdir. Ve biz çalışmalımız, bütün halqqa malümatnı yetkizecekmiz", — dep diplomat qoştı.