İşğal etilgen Qırımda Rusiye ordusına askerlikke küz çağıruvı başlandı. Tek 2025 senesi orta küz ayınıñ 13-nde işğalciler işğal etilgen Simferopoldan (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adten) 27 Qırım sakinini müddetli hızmetke aldılar. Umumen işğalciler 300-den ziyade şeer sakini Rusiye ordusına yollanılmaq niyetindeler.
"Rossiya 1. Vesti Krım" Rusiye telekanalı mahsus reportajında bu aqqında haber etti.
RF ordusında hızmet müddeti 1 yıl devam ete. İşğal etilgen Qırımda ilk sefer "tek arbiy cedvel" işke tüşürildi, onıñ yardımınen ruslar devlet organları ve iş bericilerinden "askerlikke çağıruv" aqqında malümat alalar, dep Rusiye telekanalınıñ süjetinde bildirildi.
İşğalciler 2025 senesiniñ soñuna qadar devam etecek kampaniya çerçivesinde Rusiyeniñ ordusına qaç Qırım sakinini askerlikke almağa planlaştırğanlarını açıqlamay. 2024 senesi askerlikke çağırmaq içün eñ yüksek yaş sınırı 30 yaşqa qadar köterildi. Umumen Rusiye Federatsiyası boyunca bu kampaniyada soñki 14 yıl içinde rekord miqdarda 133 biñ adam askerlikke almağa niyetleneler.
Hatırlatamız ki, Ukrayina Tış işleri nazirligi işğal etilgen topraqlarnıñ, hususan Qırımnıñ, sakinlerini Rusiye ordusında mecburiy hızmetten qaçınmağa çağırdı ve işğalcilerniñ areketleriniñ qanunsızlığını qayd etti.
"Rusiye bu "askerlikke çağıruv"nı elde etip, halqara uquq mecburiyetlerini, hususan, işğal etken devletniñ onıñ nezareti altında olğan topraqta bulunğan şahıslarnı onıñ silâlı ya da yardımcı quvetlerinde hızmet etmege mecbur etmesini yasaq etken Jenevre IV şartnamesiniñ 51-inci maddesini boza. İşğalci devletniñ ordusına hızmet etmege mecbur etüv cenk cinayeti sayıla ve cezasız qalmaycaq. Ukrayinağa qarşı cenkke celp etilse, "Yaşamağa isteyim""Хочу жить" leyhası sayesinde qurtaruv imkânından faydalanıp, Ukrayina Mudafaa quvetlerine teslim olmağa çağıramız", — dep Ukrayina TİNniñ beyanatında qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
